Yesagyo Ah Hmainor Mi Council Ralhraang Pawl PDF Tangti Phu Komh Nih An Kah Hna i 15 Nak Tlawm Lo An Thi. Magwe ramthen, Yesagyo peng, Zayetni khua le Shwehlaing khua kar ah hmai a rak nor mi council ralhraang pawl cu PDF tangti phu komh hna nih June 9 ah voi hnih an kah hna i ralhraang 15 nak tlawm lo an thi tiah Talauk PDF sin in ka theih.
Council ralhraang hna cu Shincheya khua in Zayetni khua lei hmainor in an kal lio ah PDF tangti phu komh nih naih tein an kah hna i ralhraang pawl cu lau lengmang in an zaam. An zaamnak ah a puak rih lo mi bomb hri an pah i a puah ca ah ralhraang 3 an thi tiah kan theih. Cu ti in an kah hna hnu ah ralhraang pawl cu PDF pawl nih kah ding in an i timh cia mi hmun chung ah an rak lut i 40MM le hriamhme pawl in an kah hna caah ralhraang 12 an thi than tiah ka theih.
Cu kahdohnak cu Talauk PDF (Minchain battalion 2), MGN RANGER (Minchain Battalion 2), MGN 21 (Minchain Battalion 2), MGN 35, Shwe-Ao Revolution Force SARF, Taungtha PDF le Bo Kyathit phu ( Thlanglei CDSOM) hna nih tangti in an kah hna hi a si tiah kan theih. Source: Khit Thit Media
Thawngpang dang. Ralhrang an mah le anmah an i kap. Ralhrang bawi nih ralhrang palik bawi meithal in a kah. Sagaing ramthen Hteechaing peng ralhrang palik sakhan ah palik bawi Kyaw Kyaw Oo cu ralhrang bawi Htet Lwin Aung nih June ni 8 ah meithal in a kah i, ralhrang palik cu hliam a tuar caah sizung ah zohkhanh a si tiah an chim.
June ni 8 zan suimilam pakua ah Captain Htet Lwin Aung le Palik bawi Kyaw Kyaw Oo hna cu Htee Chaing hlei pawngah bia an i el. Cu ahcun ralhrang kawlralkap bawi nih meithal in a kah i sizung ah a hliam hma zohkhanh a si. Cun a kaptu ralhrang bawi hi dantatnak zong an tuah lo tiah theih a si.
A kaptu ralhrang bawi Htet Lwin Aung cu dantatnak zong an pe lo. A umnak hmun le hma tu an thial. Uico ralkap nih uico palik a kah. Uico palik cu a thi lo i, a tu ah hin Htee Chaing sizung ah a um. Uico palik pa hi Uico ralkap nih voithum a kah tiah an langhter chih.
Leave a Reply