HRAWH PIAK LE SUNGHMI RO THILRI CAZIN KAN PE UH

Hrawh piak le sungh a simi ro thilri cazin kan pe uh tiah Save the Heritage phu nih nawlnak a thanh. Hriamtlaih buainak ruangah sungh a simi hlan lio ro thilri pawl khawmhsuat kan duh caah kan pawngkam le internet cungah kan hmuhmi hlan ro thil pawl sungh le hrawh piak a sinak thawngpang kan pe hram uh tiah Save the Heritage phu nih nawlnak a tuah.

Save the Heritage phu cu hriamtlaih buainak ruangah nunphung ro thil hna a tlaunak hnga lo ti khawhnak lam in a cawlcangmi hlan thil kong kherhhlainak le nunphung ro thil hna ṭha tein kilven a thiammi pawl fonh in Britain ram ah hram a bunhmi Non-Government phu pakhat a si.

Khawmhsuat khawhmi rothil a rawkmi cazin kha mipi sinah ṭha tein langhter ṭhan a si lai tiah Save the Heritage phu nih a thanh.Rothil hrawhpiak a sinak thawng na pek tikah 1) Hrawh piak a sinak hmun/inn. 2) Khua/khuate (GPS ah sawh khawh a si ahcun). 3) Nicaan, 4) A hrawktu phu, 5) Hrawh piak a si daan thil sinning, 6) Hmanthlak pawl Save the Heritage page chat box asilole Signal number +447729742542 asilole Telegram number +447729742542 ah kuat khawh kan si tiah bawmhhalnak a thanh. Credit: The Chinland Post.

Thawngpang dang. Hri Thlai Thahnawnnak Tuah Ti Lo Dingin SAC Cu G7 Nih Ralrin Pek. Vawlei cung Democracy ram rum bik hna nih sermi Grouf of 7(G7) nih SAC ralkap nih, Democracy a dirpitu minung pali an thahmi hna cu kan cohlang hrimhrim lo, tiah an langhter.Canada, France, Germany, Italy, Japan, British le American ram sarih in sermi G7 phu nih, hri thlai in thahnawnnak tuah ti lo ding le thongtla mi vialte chuah dingin SAC ralkap a hal.Kum 30 chungah a voikhatnak hri thlai thahnawnak le a dik lomi biaceihnak cu kawlram mizapi hna nih Democracy an i ruahchanmi zei rel lo a si, tiah an langhter.

SAC nih uknak an lakmi hi a fak bik in kan al, kan cohlang lo. Chawleh chawhrawlnak, ramkhel, zatlang nun, minung zawnruahnak lungthin le nuhrin covo kong ah kan lungre a thei, tiah cathanh an chuah.Ramkulh komh kawlram ah SAC ralkap nih thih dan pekmi hi 100 hrawng an um rih, tiah International Amnesty phu nih an langhter.

Kawlram kongah UN aiawhtu Noland Heather le Malaysia ramdang Minister Saifuddin Abdullah nih SAC ralkap nih Democracy a aupitu minung pali an thah hnanak kong ah minung thinlung pu loin sual tuahnak a si, tiah an chim.UN metting ah Myanmar ram a dirpi pengtu Russia le Tuluk nih Democracy a aupitu pali thahnak kong ah an cohlan lonak cathanh an chuah ve. Credit: The Chin Post.

Be the first to comment

Leave a Reply

Your email address will not be published.


*