ICNCC Nih Cathanh An Chuah

Falam Peng Ah Mitlamtlinglo Pakhat Thah A Tonnak Kong Ah Interim Chin National Consultative Council (ICNCC) Nih Cathanh An Chuah! 2022, June 30 ah Sagaing ramṭhen Kalaymyo in Chin ramkulh Falam khuachung ah a lutmi SAC ralkap nih Falam peng Valung khuami mitlamtlinglo (hnachet le holh thiam lo) Ṭial Kap, kum 60 cu an rak thah. Atu bantuk in sualnak ngei lo, mitlamtlinglo thah a tonnak kong telh chih in Chin ramkulh hmunkip ah SAC ralkap nih thilsual an tuahmi vialte cu pengkulh cio in ṭuanvo ngeitu hna nih ṭha tein cazin khawmhsuatnak an tuah.

Chin ramkulh chung ah SAC ralkap nih sualnak ngei lo mizapi cung ah minung ziaza keng lo in sualnak an tuah mi vialte cu faak piin kan doh. Atu bantuk sualnak an tuahmi kong ah anmah he a tlak ning tein lehrulh an si khawh nakhnga kan tawlrel lai, tiah ralrin peknak le theihternak cathanh an chuah.

Relchih; Union Election Commission(UEC) Hruaitu Le Chungtel Cheukhat Bia Ceih An Si!: NLD cozah lio i Union Election Commission (UEC) hruaitu U Hla Thein (ဦလှသိန်း) le commission chungtel 2 cu phungrelnak 130(a) in kum 3 cio thong tla ding in Naypyidaw thonginn biaceihzung ah nihin July 7 ah bia ceih an si, tiah biaceihzung rianṭuantu he naihniam in a um mi pakhat nih RFA ah a chim. Biaceih a si mi 3 cu U Hla Thein, U Hla Hte (ဦးလှဌေး) le U Myint Naing (ဦးမြင့်နိုင်) an si i, 2021 November thla khan Naypyidaw thonginn ah hren an si.

Thong chung biaceihzung ah biaceih beh an si i, atu i bia an ceih mi minung leng ah a dang an tlaih mi hna cu zeitin dah bia an ceih ve hna ti cu fiang in theih khawh a si rih lo. Phungrelnak 130 (a) hi dohkalh ah siseh, hlawt le hrial ahcun dantat ton khawhnak phung a si pinah kum 3 thong thlak khawh a si, tiah phunghram pi (Law) ah langhter a si.

President U Win Myint, rampi ruahnak petu Aung San Suu Kyi le NLD central committee chungtel cheukhat zong phungrelnak 130 (a) in dantat an si ve. Election ah vote pek ning a felfai lo ti in Aung San Suu Kyi le NLD party chungtel 422 hna cu tlaih an si i, ramkulh le ramṭhen UEC hruaitu tel in chungtel 2489 cu dantat ding in timhtuahnak kan ngei, tiah SAC Election Commission nih tukum January thla ah khan an thanh.

A luancia 2020 Election kong he pehtlai in case 1077 a chuak i, case 546 cu zohfelnak tuah a si cang. Cu chung ah taza cuai mi case 342 a um i, case phih piak ṭhan mi 194 lakah pungrelnak he zohchihmi mi 10 an um, tiah SAC Election commission nih an thanh. 2020 Election kong he pehtlai in Febuary 1, 2021 ah SAC nih uknak an laak i, cu hnu ah an duh ning poh in phunghram an mersan i, hmalaknak an tuah. Crd. The Chin Post.