Rak ka hngak ko mu, Pathian ttaang nem ah na kal cang lai i, rak ka hngak te mu. Mah video hi social media ah kan lak mi a si. A ho teh dah an si timi zong kan thei lo. Ruahnak ahcun hringtu nu bik nih a dawtmi a vapa a liam colh dingmi cu siang lo tuk in mangttha tiah biacah a tuahmi a si lai tiah kan zumh.
Hringtu nu bik nih a chimmi cu Pathian sin ahcun rak kan taak ko mu. Pathian ttaangnem ah na kal cang lai maw. Rak ka hngak ko te muuuu, tiah a dawtmi a vapa cu a thlah. Tutan ah langhtermi hi a sining an chungkhar fiangtein a theih mi kan um ahcun rak kan pehtlai te ulaw.
Tiah Zo Inspiration nih an langhter. Zo Inspiration hi mizei dah an si timi minung tampi nih a thei lomi kan um lai. Asinain tthenkhat nih cun a theimi kan um cang lai. Anmah Zo Inspiration hi Mizoram chungah bawmh chanh a haumi sifaak santlai lo a bawmchantu hna an si. An mah tawlrelnak thawngin minung tampi an tungmer cang hna.
Tutan ah hibantuk in an langhter mi hi anmah bawmchantu lila zong nih an theih lo caah thawng rak kan thanh uh tiah an ti. Acung ah chimcia bantukin an mah Group hi mizei paoh nih dirpi mi an si i, rinh chanh awk tlak taktak in mi a bawmchaantu an si. Tutan ah an chim thanhmi zong hi biatak tein an ttuan ding mi a si. Anmah page Zo Inspiration timi ah lut law an rianttuan ning na hmuh khawh dih lai. Kutsamh cio hna usih.
Thawngpang dang. SAC ralkap hriamngan ruangah a thimi hngakchia telh in sualnak ngei lo mipi 2,133 an thi cang. Myanmar ram ah hramhram in uknak lak a si hnu kum 1 le cheu caan chungah SAC ralkap nih kah/thah ruangah Myanmar ram pumpi in a nunnak a liammi sualnak ngei lo mipi 2,133 le tlaih a tongmi 14,909 tiang an um cang tiah Assistance Association for Political Prisoners (AAPP) nih a thanh.
Mah cazin hi 2021 February 1 in 2022 July 28 tiang AAPP nih a khawmhsuatmi a si i khawmhsuat khawhmi lengah a thimi an tampi rih lai tiah a langhter.Pau Dothlennak chung tuni tiang minung 11,815 an tlaih hna i cu chungah minung 1,360 cu thawngthlak ding in nawl chuah an si. Dothlennak he pehtlai in thah ding tiah nawl chuah a simi chung in 76 cu hren an si i hriawh in thah ding tiah nawl chuah a simi 42 telh in minung 121 cu hriawh in thah ding tiah biachah an si caah thah ding tiah nawl chuah a simi an zapi te 118 an si cang.
Atutiang ah biakamnak he thlah ṭhan a simi 22 an um i thlah ṭhan a simi 3,072 an um tiah a langhter. July 27 zinglei sml 8 hrawngah Magway ramṭhen, Pauk peng, Kyapitkan khua cu ralkap le pyusawhtee pawl nih hriamngan in an kah caah intual chungah lente aa celh liomi kum 4 hngakchia Ma Thein Thein Phyo cu hriamngan nih a khen i a hmun ah a thi colh tiah theih a si.
July 25 zinglei zongah Chin ramkulh, Hakha peng, Hniarlawn khua chungah SAC ralkap an luh caah khuami hna an rak zaam. Khuami pakhat a simi Salai Mang Lian Sang cu khuachung Mucu siahngakchia don ding in cycle in a kal lio lampi ah ralkap he an i tong i an kah ruangah a phei an khen i a thi a chuah luan ruangah a nunnak a liam tiah theih a si.
Leave a Reply