Ka Dawtmi Le Ka Upat Mi Rev. Dr. J. Ral Buai Phungchim mi. Nizan tihni ( May 20) zaanlei sangah kan pa Rev.Dr.J.Ral Buai nih a daw biktu le a khamhtu Jesuh Khrih sinah kal in a kan dinhtak. Amah kong hi kan Laimi paoh nih cun kan hngalh dihmi asi ko caah a kong ka tial lai lo. Kei hi amah hruihruainak in an bu ah kum kua rian kan tuan ti.
Khuate ah voi riat khual kan tlawng ti. A chuahnak khua Siata tiang zong kan kal ti. Cun Farrawn le ka khua Tlangpi zongah motor in kan kal. Voi tam ial Hakha kan um lio ah a kan tlawngmi asi. Thantlang i council ka tuan lio zong kan innchiate ah vou hnih a kan tlung bal. Cucaah amah kong hi tam nawn ka hngalh. Cun a phungchim zong voi tamtuk ka ngaih i ka theih. Pathian hman le hmal lo cu um ko seh, zapi theih khawh ding in phungchim ahcun a hopa tluk ci asi lo tiin ka hmuh.
Ka ngaihmi chung in ka lungah a cam pengmi cu Siata kan kal pah i Khuabung khuathar kan riah zaan i a chimmi asi. Tlangpi tar zong khi angei lem lo. A chim duhmi a tlangpi cu JESUH THAWNG IN ti khi asi. Cu zaan cu rawl kan ei dih in thaten ai khawlh tawl i ai thuam. Suut le nektai le kedan thatak in ai thuam. Zihmui ai kah. Ka khuaruah a har pah. Ziah civui zong asi loh, timh ciammam i pumb ding zong kan i tim loh, hiti rumro ai thuamh hnga ka ti.
Zopheipi nih an dawt tukmi asi caah UPC asi lomi zong thalak a kan pumhpi. Inn lian nawnpi ah kan i pum.kan i tlum lo. Phungchim caan cu a phan i a vang dir i Khuabung khuami hna thaten ka zoh u. Upa nih nan ka kong, ka hngakchiat lio ka nun kha nan hngalh dih ati. Cun a hnuhmai ai her. A van peh. Tuzan i suut le nektai le kedan he kai hruk i kai pumhnak hna hi ka thuamthat kan chorh duh hna bia asi lo hih.
Ngaktah a rak si mi tawhrolh tawi thitha hmanh ai hruk bal lo mi ka si nan theih ko. Angki tha zong ka rak i aih bal lo. Asinain tuzan i kai hrukmi thil thatha ka ngeih hi ka fim caah asi loh, chawleh ka thiam ca zongah asi lo, cozah rian ka tuan ca zongah asi loh. Hi thiltha a ka peetu le Yangon khua i nuamte i aka umter tu cu kan zumh i a rian ka tuanmi Jesuh ruangah asi ati.
Avan peh than. Ahopaoh zong Jesuh nan zumh le a min nan tanh paoh ahcun Jesuh nih nan herhmi an peek cio ko hna lai. Vawlei cungah hin Jesuh zumh le a min tanh tluk in a thami le a hlawkmi a um lo. Minung kan herhmi paoh Jesuh nih a ngeih dih. Kan harnak le buainak vialte a phi zong Jesuh asi ko. Cucaah Jesuh cu UPC ta bik asi lo, mi vialte ca asi. Amah min lawngah khamhnak a um…ati i a mak. ( Atak cu mahnak in a sau deuh. Ka tawiter bia) Pumh chuahpah ah mipi an i ceih urmar.
Kan tha a ba ti an hngalh le an kan leeng sau lo. Athai zing kan i thawh i Lawngtlang kan phan. Cun Ngalang ah kan lan i kan riak. Ka mitthlamah atu tiang a cam. A vang thih ruangmang tikah hi ka celh bak lo. Kan tlonlen tinak le Jesuh Khrih kong kan phuan ti caan pei a tam tuk cu. Nihin zong Pu Buai tiah ka auh zungzalmi Rev. Dr. J.Ral Buai upat peeknak canah tawite ka van in hrawmh hna. Atantakmi khrihfabu le a inchung nu le a fale le atule le an sahlawh rualchan dihlak caah thlacam bawm cio hna usih. Pa Hu Pa,kan philh kho bal lai lo ee. Credit: Rev.Dr. G. Za Thio
Leave a Reply