KAHDOHNAK AH RALHRANG MINUNG 66 AN THI

Nizan ralhrang kawlralkap le mipi ralkap rampi huap in i tukdoh kahnak ah ralhrang kawlralkap lei in minung 66 an thi i, mipi ralkap lei in minung pahnih nih ram le miphun caah an nunnak an pek ve. Culawng siloin ralhrang kawlralkap hna nih mipi ralkap chung in minung 13 hna cu an tlaih hna.

Rampi huap in April ni 28 ah ralhrang kawlral minung 66 an thah hna. Mipi ralkap lei in minung pahnih nih ram le miphun caah an nunnak an pek tiah mipi ralkap hna nih thanhnak an tuahmi chungin theih a si. Ralhrang a thimi chungah KNU kut in a thimi hi minung 25 an si.

Sagaing, Watlat ah ralhrang minung 20 an thi i, Magway, Pakoko ah minung panga an thi. Cun Matupi ah ralhrang minung 7 an thi tthan rih. Culawng siloin Sagaing, Salinkyi ah ralhrang minung pakua an thah hna. Mipi ralkap lei in a thimi hi pakhat le tlaihmi minung 13 hna hi Yangon ramtthen ah a si, minung pakhat tu hi KNU lei in a si ve. Note: Thanhnak an tuah tiangah a thimi theih khawhmi zat a si i, thanhnak an tuah hnu ah ralhrang a thimi tampi an um rih lai.

Thawngpang dang.Rampi ruahnak petu Daw Aung San Su Gyi cu sui Kilo 11 le American dollar sing 6 hrawng diklo in a lak tiah Yangon ramtthen vuanci-choh hlun simi U Phyoe Min Thein nih a puhmi case kongah, nizaan April 27 ah Naypyidaw special court nih chekhlatnak tuah in kum 5 thongtla dingah biakhiahnak an tuahpiak.Daw Aung San Su Kyi sual an puhmi case 18 chung in case 5 caah kum 6 thong thlakding a si i, a tu ah chapmi kum 5 thlakding he cu kum 11 thongtla ding a si. Daw Aung San Su Kyi nih cun biakhiahnak an tuahmi case hna le sual an puhmi kong ah diklo tiah a el.

A tubantuk in Daw Aung San Su Kyi thong thlakding in biakhiahnak a tuahtu Naypyidaw biaceihzung nih chekhlatnak a tuahmi cu upadi he aa kalh caah a dikmi checkhlatnak a silonak kong le,Nawlngeihnak la tu SAC ralkap nih Daw Aung San Su Kyi cu ramkhel lei in hnon dingah a hlankan in timhtuahnak ngeihmi biakhiahnak a si tiah nuhrin covo lei zohfelnak tuahtu HRW Asian director Phil Robertson nih RFA ah a chim. Daw Aung San Su Kyi chekhlatnak a tuahtu biaceihzung cu zalongmi biaceihzung a si lo.Cu biaceihzung in cheknak tuahmi bia hna cu i thuh in Daw Aung San Su Kyi sihni hna zong an theihmi bia kongah a leng chuahterlo ding in khamnak an tuah. An chuahpimi tttte hna zong zumhding a umlo.

A tu a case kongah a bikin sualpuhtu Yangon ramtthen vuanci-choh hlun simi U Phyoe Min Thein cu pressure an pek caah biaceihzung ah a tu bantuk in bia a chimmi si lai tiah an zumh.A chimning bantuk in sui tlang le phaisa hna zong an chuahmi ka hmulo. A tu biaceihzung hi SAC ralkap nih a duhning in Daw Aung San Su Kyi cu kum caan saupi kharkhumh a duhmi biaceihzung pakhat men a si. SAC ralkap nih nawlngeihnak an lakmi dohkhawhlonak ding caah le Daw Aung San Su Kyi cu ramkhel lei hnon dingah a hlankan in biakhiahnak tuahmi a si tiah a chim.

HRW nih a langhter ningah a tu ah cun Daw Aung San Su Kyi caah zalong tein umcaan a dih cang. Myanmar SAC hruaitu hna nih a hlankan timhtuahnak an ngeihbantuk tein thong thlakdingah biakhiahnak an tuah cang. Daw Aung San Su Kyi caah cun thih hlanlo thongthlak he aa khatko. Hramhram sualpuhnak ruangah thong thlakding kum caan cu an karhter.A ra laimi thla hna ah sualpuhnak case chap in thongchung umcaan an saughter khawh rih mi a si. Myanmar ramchung ah mizapi duhmi hruaitu thimnak democracy hrawhnak ding caah cun Daw Aung San Su Kyi cu ramkhel lei in hnon a si lai caah SAC ralkap hruaitu hna nih an dinhdorh lai lo tiah a langhter.

Daw Aung San Su Kyi a tubantuk in thil a tonmi kongah thinphang ngai a si tiah Malaysia minister of foreign affairs Saifuddin Abdullah nih Twitter ah a langhter.EU zongnih cathanh chuahmi ah Daw Aung San Su Kyi a tubantuk thil a tonmi cu ramkhel lei kongah timh ciammam tein tuahmi a si i, SAC ralkap nih nuhrin covo an buar si a ti ve.Rampi ruahnak pe tu Daw Aung San Su Kyi sualpuhnak tuahmi case 18 dihlak caah a sualko tiah biakhiahnak tuah a si ah cun, a tambik kum 190 tiang thongthla kho a si tiah an langhter. CREDIT: THE CHINPOST

Be the first to comment

Leave a Reply

Your email address will not be published.


*