Pale Kahdohnak Ah SAC Ralkap 4 An Thi, SAC Ralkap Nih Myin Ywa Le Kyaukkhuat Khua An Khangh!: Sagaing ramṭhen, Pale thlanglei Hmuaihthong (မွေ့တုံ) khua pawng ah SAC ralkap le PDF phufonh kar kahdohnak a chuak i, SAC ralkap 4 an thi, tiah Daungnat (ဒေါင်းနက်) Gurellas Force nih an thanh. Nizaan July 6 chunnitlak an i kap i, kahdohnak chung ah PDF lei minung 4 hliam hmete an tuar ve.
Nihin (July 7) zinglei Sml 9 in SAC ralkap nih Myin Ywa (မင်ရွာ) khua an khangh i, inn 100 fai a kaang, tiah Daungnat Guerillas Force sin in theih a si. “SAC ralkap le PDF cu nizaan chunnitlak kan i kap. Hmawihtaung (မွေ့တုံ) khua ah zaan riak lo in Shwelaung (ရွှေလောင်း) khua kan um lio ah kan i kap cang. Myaing peng le Pale peng PDF i bawm in kan kah hna. Ni a chuah in kahdihnak a chuak ṭhan.
SAC ralkap nih Myinywa khuahlun cu zinglei 9 tluk ah an khangh i, inn 100 tluk a kaang cang,” tiah PDF ralkap nih an chim. SAC nih khua an khangh ruangah a pawngkam khua 10 tluk cu a himnak ah an zaam, tiah theih a si. Magwe ramṭhen Myaing peng Kyaukkhuat (ကျောက်ခွက်) khua zong SAC ralkap nih nihin July 7 chun Sml 1 ah an khangh i, khua mi vialte an zaam dih, tiah We Love Myaing phu nih an thanh.
SAC ralkap nih Myaing peng nitlak lei Kyaukkhuat khua an khangh. Zinan khor maw inn dah an khangh ti cu fiang in kan thei kho lo. Mipi aa khawngdeng le hliam tuar an um le um lo zong kan thei kho rih lo, tiah We Love Myaing in rianngeitu pakhat nih a chim. Crd. The Chin Post.
Leave a Reply