Nizan May ni 28 zan Kalaymyo i kahdohnak ah ralhrang kawlralkap lei in a thimi zat an thanh cang. Nizan kahdohnak ah ralhrang kawlralkap minung pali an thi. Kalaymyo Tahan Nayciatteih pawng ralhrang kawlralkap an duty nak hmun Nizan May ni 28 zanlei suimilam paruk dengah mipi ralkap fonh hna nih an kah.
Mipi ralkap aa fonh mi hna cu Zomi PDF le CSS cun CNDF le PDF Kalay le GRF hna an si. I kahdohnak ah ralhrang kawlrlakap minung pali an thi i minung pariat hliamfak an tuar tiah Zomi PDF lei nih an thanh. Mipi ralkap lei hna cu zan suimilam pariat ah a thimi le hliamtuar um loin hnu an kir tiah an langhter.
Tutan ah ralhrang kawlralkap pawl mipi ralkap lei nih an kah hnanak a ruang an langhter mi cu. Mipi nih cohlan lomi cozah nih ningcang loin mipi cungah manman an hal hna. Mipi cungah meiman hal lo dingin mipi ralkap hna nih voitam ralrinnak an pek cang hna. Asinain zeihmanh ah an rel lo ruangah kan kahmi hna asi tiah an langhter.
SAC ralkap nih hriamngan in an kah caah Sagaing ramṭhen, Kalaymyo Tahan sang ummi minung 3 an nunnak a liam, tiah kan theih. Hi thil a can hi May 28 zan sml 8:35 hrawng ah a si. Kum 25, nu pakhat cu a fapa thlaruk mi inn leng ah a oih i, cu lio ah cun an inn tual tlakrawh ah hriamngan kuan a tla.
Ralzam nufa hna zong a khen hna caah an nunnak liam, tiah theih a si.Tahan sang ummi Pui Pui-kum 25 cu a fapa te (thlaruk) aa hngilh khawh lo caah inn leng ah a oih. Pui Pui a pu fale, Ni Ni Aye-kum 40 hrawng le a fapa Phu La Pih -kum 25 zong inn leng ah an um. Cu lioah hriamngan kuan cu an pawng tlakrawk ah a tla i, a peh hna caah Ni Ni Aye cu le a fapa cu an thi.
Pui Pui cu a tukbukhur ah a khen i sii-inn ah a thi,” tiah Pui Pui he chungkhat naihniam mi pakhat nih The Chin Post ah a chim.Ni Ni Aye le a fapa Phu La Pih hi Minkin khuami an si i, ralzam in Kalay an umnak thla thum hrawng a si cang. Pui Pui te an inn pawng ah an um i, May 28 zan cu Pui Pui te an inn ah an riak hna. A linh tuk caah inn leng an um lioah hriamngan kuan nih a tlak hna hi a si, tiah a chimchap.
An ruak cu nihin May 29 zanlei sml 2:00 ah an vui lai, tiah kan theih. Pui Pui nih a fapa, thla ruk le a vapa a roh hna. A luancia, May 25 zaan sml 8:30 hrawng ah, KalayTahan sang Wesley Nurse land pawng ah hriamngan kuan innchung ah a rak tla bal cang.
Leave a Reply