Kalaymyo thlanglei zong tuhi kahdohnak a linsa chin lengmang cang. Kalaymyo thlanglei ah ralhrang kawlralkap le mipi ralkap fonh CDF KKG le CNDF, PDF Kalay, RKDF hna cu cu July ni 11 in an i kap cang. July ni 8 ah ralhrang kawlralkap minung 160 hrawng hna cu Hanthawady in Kalay lei ah operation tuah dingin ke in an kal.
July ni 11 chun suimilam hleihnih hrawngah Hakhalay khua pawngah mipi ralkap fonh hna nih an kah hna. Suimilam pakhat chung an i kahnak ah Vakok CNDF chungin minung pakhat nih ram le miphun caah a nunnak a pek i RKDF chungtel pakhat zong fak ngai in hliam a tuar. Ralhrang kawlralkap lei in athimi le hliamtuar an um nain fiangin theih si lo tiah an langhter.
Hakhalay phungki sianginn ralhrang hna cu zankhat an riak i July ni 12 nizan zingka ah Sitha lei panh in an kal. Mipi ralkap hna nih an bawmh hna i Sitha khua in thlanglei ah an kah tthan hna. Hi i kahdohnak ah mipi ralkap lei in a nunnak liammi le hliam tuar an um lo tiah theih a si.
Cun nizan thiamthiam zanlei suimilam pakhat renglo ah Kalaymyo khuachung Sanmyo sang Ahmat 8 sianginn ah ralhrang kawlrlakap um hmun a khuarmi hna cu mipi ralkap hna nih an kah tthan hna i ralhrang a thimi le hliamtuar an um le um lo theih si lo tiah an langhter tthan. Kalaymyo le Chinram ah pehzulh in tuhi an i kap cuahmah hna, mipi ralkap caah thlacam bawm cio hna usih.
Thawngpang dang. AA ruangah Chinmi lungrethei in an um cang. AA nih Chinmi khua tthenkhat hna cu ngunkhuai an lak hna i, khuami hna cu docawi chom in an um hna. AA nih Paletwah peng Pichaung oahsuh chungin khua a ummi pawl cu thlachiar te ngunkhuai an kholh hna. Mah ngunkhuai pek hi khuami nih kan harhtuk tiah an chim. Hi auhsuh chungah a ummi hna cu thlakhat ah tingkhat nan pek hna lai tiah an ti hna. Hi konghe pehtlaiin khuammi pakhat nih a timi cu kannih khua ahcun thlakhat ah tingkhat ngunkhuai an rak lak tawn.
Asinain tingkhat zong kan tlinh kho lo. Thong 90 hrawng kan pek tawn hna. Kan harsa ngai i, an duh ning zong in kan pe kho hna lo.Kamah duhning in pek kan tim hna lo. Asinain pek lo awk tha loin nawl an chuah caah docawi hna in kan pek caan zong a um tiah a chim. Pichaung ohsuh ah hin khua 9 an um i, hi hmun le hma hi Rakhine le Bangladesh ramri ah a ummi a si i, AA pawl hmunhma an khuarnak zong a si tiah theih a si.
Hi konghe pehtlai thiamthiam khuami pakhat nih achim ve rih mi cu kannih khua hi inn 20 hrawng kan si i, AA nih tingkhat aa kan tuk. Inn zakhat hrawng umnak khua cu tinghnih an ti hna. Khua tam deuh hi cu tingkhat in ngunkhuai an lak hna. AA nih ngunkhuai an laknak hi a sau ngai cang. Ralkap sin ah kan chim i pe ko uh buainak lehlam a tam tiah an ti. Ngunkhuai kan pek nak hi kumkhat si cang lai hi tiah a chim.
Leave a Reply