Thantlang Baptist Church(TBC) Biakinn A Kaang! Chin ramkulh, Thantlang Baptist Church(TBC) Biakinn cu nihin June 9 zanlei sml 4:30 hrawng ah a kaang, tiah theih a si. Thantlang upa pakhat nih cun, “Tuzanlei sml 4:30 hrawng ah kan Biakinn pi cu a kaang.
Vuichip tlang lei zong in hmuh khawh a si. Inn dang a kaangmi um le um lo tu cu kan hngal kho rih lo,” tiah The Chin Post ah a chim.TBC cu Thantlang biakinn vialte lakah a hlun bikmi Biakinn a si i, 1965 hrawng Thantlang khua rak i ṭhial lio ah Rev. Hei Mang nih a rak kan hruai i, TBC hmun hi a ṭha bik, a rem bik a rak ti caah hi hmun hi kan rak thim, tiah a chimchap.
TBC chungtel pakhat nih, Tuan piin a kaang te lai tiah kan ruahcia mi a si ko. Asinain kan Biakinn pi a vun kangh taktak tikah cun kan ngaih a chia tuk hringhran. Biakinn hlun bik le pupa ro bantuk in kan ruahmi a si caah kan ngaih a chia khun, tiah The Chin Post ah a chim.TBC cu milu 3000 leng le chungkhar 600 hrawng an i pumhnak Biakinn a si. Thantlang khuachung ah TBC Quarter 6 telh in Biakinn 10 a kaang cang. TCP
TBC Lei Nih An Thanh Ning. Apoituk hringhran ko e, Thantlang khuapi nih arfi le thlapa bang kan i zoh chunmi Thantlang Baptist Church biakinn pi cu ralhrang kut in a ciam ruangmang cang ee. Hi konghe pehtlaiin Thantlang Baptist Church nih zapi sin ah thawngthanhnak an tuah mi cu a tanglei bantuk in a si.
Thantlang Baptist Church. 2021 October 29 ni ah TBC Office & Quarters, 2021 December 17 Ni ah Christian Community Hall, Evangelist umnak inn, Innhngak umnak inn le coka, Thlacam nak inn, 2021 December 30 ni ah Jubilee Memorial Hall, TBC meeting room le guest house le quarters, Mucu, 2022 June 9 ah TBC Biakinn pi hna cu Ralhrang kut in an ciam ee. Bawipa kan philh sawh hlah.
Leave a Reply