Khamh Conak Dingah ( How To Be Saved?) Khamhnak co, asi lo, Pathian he i remnak dingah a phunphun in chim khawh asi ko. Atha bik le a fiang bik zong a um hlei lo.Thiang Thlarau riantuannak ai tel hi a biapi bikmi asi. A cheu cu sualchirnak kong chimhnak le cawnpiaknak in an hrinthan. A cheu cu Pathian dawtnak kong an i fian in an hrinthan.
A cheu ve cu Khrih thisen riantuannak kong an theih in khamh an co. Asinain fiangte le ai changtete i cawnpiaknak i a hrinthanmi hi an tam cem ti khawh asi. Cucaah atanglei kong hna hi khamh conak caah hngalh a herhmi an si bantuk in tawiten kan van zoh ti hna lai. Pakhatnak. Pathian Khanmi A Um( God’s Plan)Pathian nih hin a kan dawt tuk i Amah he kan i rem i hrinthanmi kan sinak lai a rak timhlamh i a rak khan cang.
Pathian bia nih hitin ati. Pathian nih vawlei hi a dawt hringhran caah a Fapa ngeihchunte kha a peek, Amah a zummi paoh cu an thi ti lai lo, zungzal nunnak an ngei lai,” Johan 3:16. Vawlei atimi hi a fing le a tlang si lo in a chung ummi minung hi kan si. Nai tel i kai tel ve. Pahnihnak. Kan Buainak, Asi Lo, Kan Piahtana ( Our Problem) Kan piahtana ngan bik cu kan sualnak nih Pathian he a kan then hi asi, Isaiah 59:2.
Olzaang tak in Pathian he kan i rem kho lo, kan sualnak nih a kan dawnh. Uico kan zuatmi nih midang eek a lukhat i a van i lawipi ahcun kan innchung luh kan senh lo. Cucaah a lu cung eek a thian ta a herh bang kan sualnak kha thianhpiak lo cun Pathian nih a sinah a kan cohlang kho lo. Cathiang ah, Mi vialte nih kan sual dih cio ko i Pathian sunparnak kha kan bau dih cio ko,” tiah ati,Rom 3:23. Cun Cathiang thiam ah, Sualnak man cu thihnak asi, tiah kan hmuh than,Rom 6:23. Sual man leiba champiak lo ahcun a lotlau dih ding kan si.
Pathumnak. Pathian Champiaknak ( God’s Payment) Kan sual leiba cu Khrih nih vailam cung a thihnak in a kan champiak dih cang. Hallelujah! Hihi khamhnak thawngtha a hrampi cu asi. Khrih nih a pum hrimhrim in kan sualnak cu vailam tahnak ah khan a kalpi i cucaah kannih cu sualnak ah khan kan thi cang i dinnak ah khan kan nung cang,” 1Pet 2:24.Cathiang chungah a rak i tial bang khan Khrih cu kan sualnak caah a thi, cun Cathiang chungah a tial rih bantuk khan an vui i ni thum hnu ah thawhter asi,” 1Korin 15:3,4.
Palinak. Kannih Rian ( Our Response) Kannih rian titikah tuannak lei khi chim duhmi asi lo, kan leh ding ning khi chim duhmi asi. Rawlhrawn an kan sawm ahcun rawldum ah i thawh i va ei a hau. Laksawng an kan thenh ahcun ee tiin cohlan phung asi. Cuve bang Khrih nih ka caah a thi i a thothan ti kan theih i kan zumh ahcun Amah kha kan fuhpanh i kan Bawi le Khamhtu ah cohlan ding kan si. Phun dang i chim ahcun kan theihmi thawngtha kha ka caah asi ti pom in Jesuh Khrih kha kan zumh a herh.
Cutuicun velngeihnak ruangah zumhnak thawng lawng in khamh kan si lai,Efes 2:8.Mindat peng i saya pa pakhat nih a hrinthannak kong tehte a khanmi cu ka uar ngaite. A min ka philh cang. Khual a tlawnpah i tlanghram a kal pah ah a thinlung dihlak in Johan 3:16 kha a kaa in a phuan. Amin cu Za Khamh va si ko seh. Hitin aw thangpin a au. Pathian nih Za Khamh cu a dawt hringhran caah a Fapa ngeihchunte kha a peek.
Cucaah Za Khamh nih ka zumh cang caah ka thi ti lai lo, zungzal nunnak ka ngei cang,” ati. Cule caangka ka chungah ka co bal lomi hnangamnak a tlung i ka ngei. Cun ka hrinthan cawlh bak ko ati. Nang zong, cu saya pa bang tuah ve ko hmanh. Lungtak in na zumh le na phuan ahcun Pathian daihnak na co ve ko lai. Bawipa nih a relmi, a sharetu, commenttu le lungtak in biatak a phuangmi nan cungah a velngeihnak le zaangfahnak in thumh chap ko hna seh mu. Amen! Credit: Thio Za
Leave a Reply