KNDF CAAH THAWNG THA TUK SI PHU 3 FONH HNA NIH ANBAWMH CANG LAI

Karenni Nationalities Defense Force(KNDF) cu, kan si khawh chung in bawmhnak kan pek lai, tiah KNDF kumkhat tlin camtuak ah Arakan Army(AA), Ta`ang National Liberation Army(TNLA)le Myanmar National Democratic Alliance Army(MNDAA) ṭangṭi phu 3 hna nih lawmhpinak ca an kuat mi chung ah an telh chih.Nihin May 31 ah an dohthlennak kum khat tlin camtuak a tling mi KNDF cu AA, TNLA le MNDAA nih lung lawmhpinak ca an kuat hna, tiah theih a si.

Lunglawmhnak an kuat mi cathanh chung ah, KNDF nih raltuknak kong ah a sermi phunglam le ramkhel an hmuitinh an hlawh a tlin nakhnga le Karenni mizapi nih, an i tinhmi an co khawh nakding ah thla kan in campiak hna, tiah an langhter.SAC hruaitu pawl nih, remdaih tonbiaruahnak ah a kai duh lomi, Arakan Army(AA), Ta`ang National Liberation Army(TNLA)le Myanmar National Democratic Alliance Army(MNDAA) cu ralhrang nan si, tiah an ti hna. Asinain, ṭangṭi phu 3 a si mi AA, TNLA le MNDAA hna cu, NUG le tualchung PDF hna he tonnak an ngei, tiah theih a si.

SAC Ralkap Nih Yinmarpin Peng Ah Tualchung Mi 1 An Thah, 3 A Nung In An Khangh Hna: Sagaing ramṭhen, Yinmarpin peng LayNgauh(လည်ငေါက်) khua ah SAC ralkap pawl an lut i, mizapi inn cu mei in an khangh hna pin ah LayNgauh khuami 1 cu, a cal ah meithal in an kah thah pin ah 3 cu a nung in mei in an khangh hna, tiah theih a si.

SAC ralkap pawl cu, May 27 zanlei sml 4:00 in LayNgauh khua ah umhmun an khuar i, May 28 zinglei sang ah khuami an thilri man sung cu an fir, inn zong mei in an khangh caah inn 50 hrawng a ciam, tiah Yinmarpin thawng zamhnak pakhat sin in theih a si. Cu bantuk in Shwe Seti(ရွှေစေတီ ) Phungki sianginn um motor 2 le Shwe San Pin phungki sianginn ummi Express motor 1 cu, SAC ralkap nih mei in an khangh.

SAC ralkap nih, LayNgauh khua an khangh lioah tualchung mi nu 2 cu, meithal in an kah hna caah an i hliam. LayNgauh khuami dihlak in an zam dih. Inn kaangmi cu an phalh kho hna lo, tiah theih a si. SAC ralkap nih Magway le Sagaing ramṭhen ah phone le internet line an phih i, khuate tam tuk mei in an khangh pinah tualchung mi hna zong an thah hna.Crd; The chin post