Thawngpang ttha taktak si ko. Tuni cu hlawhtlinnak nganpi mipi ralkap hna nih an hmuh. Lung a hmui taktak. Tuni May ni 7 ah ralhrang kawlralkap hna cu mipi ralkap KNDF le KA fonh hna nih an tthuat hna i, ralhrang kawlralkap lei in a thimi hi minung pakul nak tlawmlo an si. Cun ralhrang motor pali zong an khangh rih.
Ralhrang pawl a nung in an tlaihmi hna hi minung paruk an si. Hi konghe pehtlaiin KNDF chungtel pakhat nih a chimmi cu ralhrang hna cu KA le KNDF fonh kan kah hna. Ralhrang minung pakul a thimi hi mit hmuh an si. A tlawmbik pakul cu an thi ko. Cun minung paruk zong tlaih rih an si tiah a chim.
Tuni an i kahdohnak ah ralhrang kawlralkap a thimi ruak siseh, ralhrang kawlralkap a nung in an tlaihmi hna siseh, Cun ralhrang motor an khangh piak mi hna cu video in an langhter chih. Video zong zapi hmuh ah an langhter cang. Ralhrang pawl hi nikhat hnu nikhat an sung chin lengmang ko cang.
Thawngpang dang. Ram le miphun ca a nunnak a pe mi CNA ralkap hna hmanthlak. 2022 May ni 5, Ram le miphun kilven raltuknak hmun ah a nunnak a petu CNA ralkap pasal tha pali hna hmanthlak cu CIC nih upat peknak le ngaihchiatpinak he nihin ah a langhter.
May 5 raltuknak ah nunnak a petu Chin National Army (CNA) in ralkap pali; Bawino Van Biak Tling, Coporal Thawng Hup Lian, Ralkap Zo Lian Thang le Ralkap Biak Hlei Sang hmanthlak langhter an si. CDF Thantlang zong nih May 5 raltuknak ah ram ca nunnak a petu ralkap pali upatnak le chungkhar ngaihchiatpinak ca an chuah ve. Photo: CIC
Leave a Reply