LAIMI NIH VANCHIATNAK NGAN PI PAKHAT KAN NGEIH CAAH CACC SINAH NAWLNAK. Mirang nih “discipline” tiah an ti i, Kawl nih “Sii-kaan” an ti i Korea nih “gyugul” tiah an timi biafang khi kan Lai holh in kan ngei rua lo.Cucaah Laimi cu “discipline” timi biafang hi kan ngeih lo rualrual in discipline hi kan ngei taktak ve rua lo. Cucu khawikadah kan hmuh khawh!
Pakhatnak. ZUDINNAK AH Korea, Kawl le mirang zonghi zuu an ding ngai ve. Zu hi a din zia a thiam. Disciple an ngei. Cucaah tam tuk in an ding lo. Cun, zu an rit tikah an buai lo. Laimi cu zu kan rit rawh ahcun zei buainak dah ka tuah lai, ahodah ka ngiar lai ti lawngte kan ruat cang. Korea ah Falam lei kan naule pahnih cu zu an ding i voi khat din bakah beer thawl 18 an din. An ri tuk i zuthawl hram ah puan lo in an i hngilh beh.
Pahnihnak. PHONE HMANNAK AH Atu kan chan ahcun vawlei pumpi ah smart phone hi hman dih asi cang. Ram thangcho ahcun mino nih a hman zia an thiam deuh. Phone an ngeihmi kha tthanchonak caah an hman hlei ah an cacawnmi ah phone nih an caan chut lo tein hman khawh an i zuam. Laimi cu phone an i thlaih cang ahcun ca zoh an i tim ti lo, zinglei 7:00 zong ah an tho kho ti hna lo. Zing 6:00 i thawh hi zaan-ttim i thawh bantukin an i harh cang.
Pathumnak. KHRISMAS NI HNIH PEHNAK AH Laitlang khuate cheukhat ahcun Khrismas hi ni hnih peh in an tuah. Jesuh chuah an i lawmh tuk caah ni hnih an peek bia cu asi ka zum lo. Siasa an vuai deuh lo caah ni hnih an peekmi tukhi si dawh asi.
Palinak. CHUNHTHAHNAK AH Laimi cu chiat-that ni ahhin chunhthah kan hmang. Chungttuan tampi cu sa fir lei in an rak i la ti asi. Khikhi zoh a chia ngaimi le i nautat ngai dingmi thil khi asi. Yangon Baibal siangin pakhat ah puai a um le caw an that. Chungttuan pawl nih cawsa kha cheu thum ah cheu khat cu an chumh pah in an com dih caah sa an i zaa ti lo ti asi.
Panganak. PUMHNAK AH Laimi Khrihfabu ahcun caantlaitu nih a duh chung in a rak sermon ve, a duhmi poh nih an duh can poh tette an rak khan cio, a huammi poh nih solo an sak cio, phungchimtu nih a duh can poh in phung a chim, thlacamtu nih an duh can poh in thla an cam, holhtheihlo hla a sa i a laammi nih an duh chung in caan an laak, hngakchia hi zawng bantukin hna an hnok i control khawh an si lo, upa mifim deuh kan timi hna tel in pumh lio i a lut a chuakmi le ai chawk luklakmi an um peng.
Paul hi nung rih selaw Korin khua bantukin Laimi hi ca a kan kuat ve hnga i ralrinnak a kan peek ve hrimhrim lai ti cu a fiang. Laimi i pumh chung cu caan khiah piak awk a ttha lo. Nazi pa khat lawng a rau ko men, nazi pathum chung zong a rau ve kho men. Thiang Thlarau ai phuan caah asi lo, mumal ngei lo in kan um ca tuah asi.
Cu asi caah, CACC nih “discipline” timi biafang hi kan Lai holh in rak kan ser piak ve ulaw, discipline zong cu kan ngei deuh men hna hnga tiah ka ruah. Nan ser cangmi a um zongah sentence tampi in kha biafang kha rak kan ttial piak ulaw, tampi in hmang hna usih! Credit: Aung Myint Thang.
Leave a Reply