Chinmi kan caah cun lung a fak in ngaih a chia hringhran ko ee, Ralhrang Kawlralkap hna nih Falam le Hakha karlak ah a ummi Taal khua cu a dihlak ti awk in an khangh. An khangh lomi inn sarih te lawng khan a si. A dang vialte hna cu ralhrang Mifir khu hna nih an khangh dih. Hmanthlak vun langhter mi hi zoh ulaw a fiang lai.
Ralhrang kawlralkap mifir khu hna nih Taal khua an khangh hlan le an khangh hnu hmanthlak a si. Ralhrang kawlralkap hna nih Taal khua cu nikum October thla ah khangh hram an thok i, tukum July ni 9 ah an khangh tthan. Atu an khangh hnu hmanthlak zoh tikah biakinn he inn sarih lawng khangh lomi a si.
Thawngpang dang. SAC ralkap pawl kahdohnak chungah anmah le anmah an i that. A luancia June 28 ah Myanmar-India ramri ah a ummi Lailenpi khua in Matupi lei ah a raami SAC ralkap pawl nih an sinah aa telmi raifanh in a zawmi ralkap pahnih cu an phorh hna. Lailenpi le Matupi karlak hi mawṭaw in cun nikhat chung kal a si.Asinain SAC ralkap pawl cu hriam he, ṭaung he ke in an kal caah an ruahning tluk in an lam a tluang lo. A zawmi le hliam a pumi pawl zong an lam thluan ah an i tel.
Cubantuk lam har ah sii tlamtlin lo ruangah a zawmi an hawile cu an thah hna.Lailenpi le Aayu khua karlak ah kahdohnak a um lo. Kanmah lei mi zong an um lo.Kahdohnak chungah raifanh nih a tlunhmi an hawile pahnih ruak kan hmuh. Cun, Amlai le Yankhan khua karlak kahdohnak ah hma a pumi 2 zong an thah hna” tiah thilfiang a theimi pakhat nih Mizzima ah a chim.Cun July 6-7 kahdohnak ah a thimi ralkap ruak pawl cu inntang le lamkam ah an hlonh hna i CDF-Matupi nih an khanghpiak hna.
Ahlan ahcun ralram kan kal tikah, ka nau nang cu um ko, nupi le fa he na si tiah zawn i ruah a si. Sihmanh sehlaw atu ahcun kahdohnak a um tikah zeitik dah ka zaam lai ti a bawhmi lawngte an si” tiah ralkap hlun pakhat nih Mizzima ah a chim.Ralkap a lutmi pawl zong hi fimnak ṭha tein a ngei lomi an si i a leng an um lio zongah an duh poah a ṭhudir mi an si.
Ralkap chung an um tik zongah an duh poah in an um ṭhiam i ralram an kal tikah mipi innlo khangh, fir le thahnak hna an duh poah in an tuah.Khuachung an rak luh tikah, hnahnawhnak kan pe hlah uh! Hna na kan hnawh cun nan khua kan khangh dih lai. Hnahnawhnak a kan pemi khua pawl an khanghmi a tlawm ti lo.
Nan khua ah meithal kuankhat a puah cun atu bantuk in inn khanghpiak nan si lai tiah inn 3 an khangh tak” khanghpiak a tongmi khuami nih Mizzima ah a chim.Lailenpi le Matupi karlak ah SAC ralkap le CDF-Matupi cu kahdohnak voi 4 a chuak i SAC ralkap 15 an thi tiah theih a si. Credit: The Chinland Post
Falam Le Hakha Karlak Ah SAC Ralkap 70 Hrawng An Thi! July Thlathok in Chinram ah a rak kai mi SAC ralkap hna cu Falam an phanh hnu in Hakha an panh lei ah CJDF commando le Chin ralkap phufonh hna nih an kah hna caah SAC ralkap pawl cu Falam le Hakha cu zarhkhat leng an rau. Hi kahdohnak chung ahhin SAC ralkap lei tamtuk an thih caah cheuthum cheukhat hrawng cu an thi lai, tiah ruah a si.
Kalay in Laitlang lei ah a kaimi motor hi ralkap motor 20 hrawng lengah motor dangdang tlawmpal an si i, minung 200 hrawng lengah hriamnam le thilri dangdang an phorh lai, tiah zumh a si. July 7 khan kahdohnak thawng theih pah a si i, Falam in Hakha an panh lei ah Chin ralkap phufonh pawl nih bomb le hriamnam ṭhaṭha in an rak ṭhuat hna!
CNDF in Defense Secretary Salai Biak Lian Sang chim ning ah cun, Falam le Hakha kar lampi ahhin zarhkhat fai an i kap i, meng 20 huamchung(area) ah faak ngai in an i kap. Kahdohnak ah cun ruahning leng in SAC ralkap lei a thi mi an tam i, hmunkip ah an ruak i khanghnak le an taksa ruhkhua pelpawi leng ah an thilri nawi an hmuh len hna.
SAC ralkap hna ruak thilri an hmuh mi lak ah cun ralbawi captain thilri zong an i tel. Cheukhat ruak cu khuachung ah an luhpi hna i, innchung ah chia in, inn he an khangh chih hna.SAC ralkap pawl nih cun an hawile ruak cu thuhnawh len an i tim nain an thupnawk cawk kho lo, an thilri lengah an thi le hnai tampi hmuh khawh a si.
Kahdohnak ah hliam a tuar mi cheukhat cu lampi ah an thi lai, tiah zumh a si.Tutan kahdohnak ahhin a tlawm bik ah ralhrang 70 hrawng cu an lai tiah kan ruah, ti in CNDF Defense Secretary Salai Biak Lian Sang nih cun media ah a chim.Salai Biak nih cun, atu tan kahdohnak i ralram a chuakmi Chin ralkap cheukhat cu CJDF commando training a dih rih lo mi an si buin kahdohnak ah an cawlcangh ning lung a hmui kong a chim rih i, sinain meithal kuan an herh zat an ngeih lo caah an nunnak a liam dengmang kong a chim.
Kan thanh cang bantuk in tutan Falam le Hakha karlak SAC le Chin ralkap kahdohnak cu a faak ngai i, SAC ralkap zong nih inn zeimawzat an khangh! Ṭaal khua ah Inn 29, Tlangzar ah Inn 6 le Chunchung khua ah Inn 14, a dihlak in Inn 49 an khangh! Nizan July 17, zanlei suimilam 4 luan hrawng ahkhan SAC ralkap pawl cu Hakha an lut kho i, hliamtuar mi 18 zong Hakha Sizungpi ah an chiah hna tiah theih a si. Credit:The Chin Post.
Leave a Reply