LUNG A FAK TUK EE, CELH BAK A SI LO, RALHRANG RUANG BAK AH

Chin ramkulh Mindat- Matupi lampi um mi Aidar khua cu SAC ralkap nih atu le atu an hrawh. April thla dongh zong ah khan a voithumnak an hrawh ṭhan. Cucaah bawmhnak kan herh tuk, tiah Aidar khua mi hna nih an chim. Mindat in Matupi ah SAC ralkap pawl cu voithum an kal cang i, an kal fatin Mindat le Matupi kar um mi Chainpian, Harṭu,

Ramṭing le Hmunṭung khua hna cu an hrawh lawng siloin, phaisa, Ar, Vok, Sia le Innsaknak thilri hna an fir, tiah tualchung mi hna nih an chim. SAC ralkap nih inn an hrawh lengah mei in an khangh caah khua mi hna cu 2021 October thla in ramlak ah har ngai in khua kan sa.

Ramlak khua kan saknak hi thla 8 a si cang i, eidin zong kan chambau tuk cang. Ralzamnak ah minung 6 an thi cang. Ngandamnak lei le eidin kong ah a ran khawh chung in bawmh kan herh ko, tiah ralzaam mi hna nih an chim. Credit: The Chin Post. Note. Hmanthlak langhter mi hi Mindat ralzaam hngakchia an si.

Thawngpang dang. May 5 Kahdohnak Ah A Nunnak Liam Mi Salai Hrang Lian, Ni 2 Hnu Ah A Ruak An Hmuh. May 5 Tlangzar kahdohnak ah a nunnak liam mi Salai Hrang Lian Hnin (Thau) cu Ni 2 a rauh hnu Nizaan, May 7 zing ah a ruak an hmuh i an khua (Thau )ah an tlun pi i suimilam pakhat chung ruak an suan hnu a zaanlei ah a ruak an vui colh.

May 5 Tlangzar kahdohnak ah Chin ralkap 9 an nunnak a liam ti a si nain The Chin Post nih minung 8 lawng kan fehter khawh. Chin ralkap a nunnak liam mi hna cu Salai Thawng Hup Lian, Salai Tha Hlei Sang, Salai Dawt Tha Cung, Salai Van Biak, Salai Thawng Tha Peng, Salai Zo Thang Lian,Salai Biak Hlei Sang, Salai Hrang Lian Hnin hna an si. Chin ram le Miphun caah nunnak a pe mi Chin ralkap vialte upatnak sangbik kan in pek hna.