Ralhrang nih kumkhat renglo nawlngaihnak an lak hnu ah rampi huap in inn an khanghmi hi inn 22299 nak tlawmlo a si cang tiah an langhter. Hi chungah Biakinn tampi aa tel tiah hlat hlaitu ISP-Myanmar nih thanhnak an tuah. Cazin an langhtermi hi nikum February nikhat in Tukum May ni 26 tiang a si.
May thlachung lawng ah khan mipi umnak inn an khanghmi hi inn 7662 nak tlawmlo a si. Kumkhat renglo chungah May thla an khangh mi hi a tambik thla a si. An khanghmi chungah hin Sagaing ramthen hi ralhrang nih an khanghmi chungah a tambik a si. Rampi huap thenthum ah thenkhat hi Sagaing ah a si.
A vung chang ah Magway ramthen hi a si. Tutan ah an langhtermi inn kaang hi cazin langhtermi nak in a tam deuh lai tiah an zumh. Cazin langhter lomi May ni 26 in Ni 31 tiang zarhkhat chungah Sagaing ramthen, Kani peng lawngah khua 14 chungah inn thongkhat hrawng a kaang rih tiah an chim.
Ralhrang kawlralkap hna nih ningcang loin uknak an lak hnu in mipi inn tampi an khangh ruangah khuami hna cu inn ngeilo in an vak vai hna i, pawngkam khuate tthenkhat ah siseh pungki sianginn tibantuk le ramtang le dum tibantuk hna ah mipi hna cu khua an sa hna tiah theih a si.
Leave a Reply