SAC ralkap Gangaw in Matupi ah an kal i mipi 2 an thah, khuami 30 hrawng an tlaih hna. Magway ramṭhen, Gangaw in Chin ramkulh, Matupi peng Zotung lei ah July 24 thok in SAC ralkap pawl hmun 2 in an kal i khuami 30 hrawng an tlaih hna tiah Supreme Council CDF-Zotung nih a thanh.
SAC ralkap phu khat cu Zotung hmunhma Zawngnak khua in Tilaw lei ah an kal i adang phu khat cu Gangaw le Zotung ramri Zipia, Anta le Ramsi khua hna ah an lut. Ramsi khuami 30 hrawng an tlaih hna tiah Supreme Council CDF-Zotung nih a thanh.SAC ralkap pawl an ratnak Zipia le Anta khua karlak ah SAC ralkap nih thahmi min theih lo mipi ruak 2 hmuh a si.
SAC ralkap pawl cu Ramsi khua pawngkam ah cawlcanghnak an tuah i adang phu khat cu Rezua-Matupi lei ah an kal tiah ruahdamh a si caah khuami hna nih cuka hmun lei ah umkal loding in Supreme Council CDF-Zotung nih ralrinnak a thanh.
Abiapituk mi relchap. Hrawh piak le sungh a simi ro thilri cazin kan pe uh tiah Save the Heritage phu nih nawlnak a thanh. Hriamtlaih buainak ruangah sungh a simi hlan lio ro thilri pawl khawmhsuat kan duh caah kan pawngkam le internet cungah kan hmuhmi hlan ro thil pawl sungh le hrawh piak a sinak thawngpang kan pe hram uh tiah Save the Heritage phu nih nawlnak a tuah.
Save the Heritage phu cu hriamtlaih buainak ruangah nunphung ro thil hna a tlaunak hnga lo ti khawhnak lam in a cawlcangmi hlan thil kong kherhhlainak le nunphung ro thil hna ṭha tein kilven a thiammi pawl fonh in Britain ram ah hram a bunhmi Non-Government phu pakhat a si.Khawmhsuat khawhmi rothil a rawkmi cazin kha mipi sinah ṭha tein langhter ṭhan a si lai tiah Save the Heritage phu nih a thanh.
Rothil hrawhpiak a sinak thawng na pek tikah 1) Hrawh piak a sinak hmun/inn. 2) Khua/khuate (GPS ah sawh khawh a si ahcun). 3) Nicaan, 4) A hrawktu phu, 5) Hrawh piak a si daan thil sinning, 6) Hmanthlak pawl Save the Heritage page chat box asilole Signal number +447729742542 asilole Telegram number +447729742542 ah kuat khawh kan si tiah bawmhhalnak a thanh. Credit: The Chinland Post.
Leave a Reply