Magwe ramthen, Htilin Myomah Palek Sakhaan in palek pakhat meithal zun 2, zenthong 200 leng, 40MM bomb thei 1 he CDM a tuah ca ah sing 110 laksawng an pek. Magwe ramthen, Htilin Myomah Palek Sakhaan in palek pakhat cu meithal zun 2, meithal kuan 200 leng le 40MM bomb thei 1 he CDM a tuah caah sing 110 laksawng kan pek tiah Htilin PDF nih nizan May 21 ah thawng an thanh.
Magwe ramthen, Gangaw pengkomh, Htilin Myomah Palek Sakhaan in palek pakhat cu mizapi nih lungtlinpi lo mi ralhraang uknak cu a duh ve lo caah G3 meithal zun 1, kuan bawm 2, G3 kuan 194, 40MM bomb thei 1, MK22 meithal zun 1, kuan bawm 1 le kuan 20 he PDF Htilin sin ah CDM a tuah tiah kan theih.
Hi palek pa hi council ralhraang nih uknak an lak ka 2021 March 7 thawk in CDM a rak tuah mi a si nain tlaih a ton than ca ah Non-CDM in Gangaw khua Gate pawl ah pehtlai in rian a tuan than. Asinain ralhraang uknak duh lo in PDF ah kal a duh mi a si ca ah May 10 ah CDM a tuah than i PDF Htilin (Yaw Region) nih laksawng sing 110 an pek tiah kan theih.CDM palek pa nih cun NUG nih aa hmaithlak ning tein ka zulh lai. PDF Htilin ah um in rian an ka khinhnak hmun poh ah rian ka tuan ve lai” ti in a chim tiah kan theih. Credit: The Hakha Post
Thawngpang dang. Chin Relief Committee In Mizoram (CRCM) Nih Ambulance An Cawk Mi Pathian Sin Pekchanh Thlacamnak Tuah.Mizoram Khualipi Aizawl ah hrambunh in Chin miphun caah si khawhtawk in a cawlcang mi Chin Relief Committee in Mizoram (CRCM) nih Chin mizapi hna nih Vaurawng Zulthil sin in pekchanh mi in Chin ralkap hliamtuar hna phurhtlunhnak caah Mizaw phurhnak mawtaw (Ambulance) an cawk mi cu Nihin May 21 chunhnu slm 2:00 ah CRCM Office ah Pathian sin lunglawmhnak biachimnak le pekchanh thlacamnak le zaanriah dumttinak an tuah i Dawrpui Vengthar Khuabawi zong nih a tel pi hna.
Hi Ambulance cu Chin ralkap hna ai hliam mi phurh tlunhnak caah hman a si lai, A hlan ahcun kan ralkap hna hliam an tuar tik ah Farkawn in Aizawl tiang ah Rupee 18,000 hna an kan lak, Camp Victoria tiang va ttum ahcun 20,000 hna si caah tampi a dih tawn, A tucu kanmah nih kan ngeih cang caah petrol te lawng an thun lai i manlo (Free) tein kan ralkap ai hliam mi kan phurh tlunh khawh cang hna lai, Kan ralkap lawng si loin Chin miphun nih thihloh le zawtfah kan ton caan zong ah Committee sin ah bawmh hal khawh kan si i,Mizoram nih mawtaw an hlan i man an lak ning ahcun 1km ah India phaisa 80 an lak tawn,
Kannih nih 40 deuh in ti bantuk zong in Committee biakhiahnak in hlankhawh asi tiah CRCM ttuanvo ngeitu pakhat nih The Chin Post ah a chim.Chin Relief Committee In Mizoram cu Kawlram a buaika 2021 March 6 ah Aizawl khuasa Chin mi minung 84 tonnak an rak ngeih hnu ah dirh mi a si,Cu lio ahcun Myanmar CDM Supporting Committee tiah min an rak i bunh nain a hnu ah Chin Relief Committee In Mizoram tiah min an thlen i India Central Cozah zong nih a theih pi mi Committee a si.A tu lio ah CRCM nih Aizawl ah Chin ralkap damlo 12 an zohkhenh cuahmah lio hna i pakhat hi siizung ah ai thlop cuahmah lio asi, Tuzan (May 21) ah Hakha lei in hliamtuar 2 an phan rih lai tiah Mizaw zohkhenhnak ah ttuanvo ngeitu nih The Chin Post ah a chim.
Leave a Reply