MIN AUNG HLAING SIN AH RALTUKNAK VANLONG 6 A PHAN CANG

Ralhrang Kawlralkap sin ah Russia ser raltuknak vanlong paruk cu Naypyidaw a phan cang. A liamcia kum 2018 ah US dollar 204 million man Russia sin ah kawlram nih a cawkmi cu raltuknak vanlong cu a phan cang. Mah raltuknak vanlong a phanmi hi biatak tein kilvennak tangah an chiah tiah ralhrang lei in an chim.

Min Aung Hlaing hruaimi ralhrang kawlralkap hna nih kum 2018 ah Russia ser Sukho SU-30SME Jet Fighter hi pakhat Dollar 34 million in an rak cawk. A dihlak in an cawkmi hi paruk a si i, dollar 204 million a si. Kumpi kum tluk a rauh hnu ah Naypyidaw an phan cang tiah tutan ah thanhnak an tuah.

Mah raltuknak ralhrang sin a phanmi SU-30SME raltuknak vanlong hi meithal kua siseh missile tiang a phur khomi a si. Mah raltuknak vanlong an ngeihmi a thar hi tutiang ah raltuknak ah an hmang rih lo. Russia pilot hna he training an tuah cuahmah lio a si tiah theih a si.

Ralhrang kawlralkap hna nih mipi ralkap pahnih le khuami minung paruk an thah hna. Sagaing ramthen Chaung Oo peng Kaan Gyi khua ah ummi a khuarmi ralhrang kawlralkap le ralhrang hnuzul Pyu Saw Htee hna nih Nizan June ni 7 suimilam 7 hrawngah mipi ralkap PDF pahnih an tlaih hna. Culawng siloin khuami minung paruk an tlaih rih hna. Cu an tlaihmi hna cu ralhrang kawlralkap hna nih an thah hna tiah CHU PDF sin in theih a si. Ralhrang hna nih an thahmi PDF pahnih hi Chaung Oo peng mipi ralkap chungin Chaing Ko le Nandah an si.

Adang minung paruk hi khuami an si tiah theih a si.Hi konghe pehtlaiin Chaung Oo peng mipi ralkap PDF nih ngaihchiatnak a tongmi chungkhar sin ah an ngaihchiatnak zong an langhter. Ralhrang ukpennak hrawh timh in doh cuahmah lio ah a tubantukin nunnak a liam hi a poituk hringhran. Nan lo hma cu kanmah nih kan rak pehzulh lai tiah biakamnak an tuah.