Sagaing ramṭhen, Buhtalin peng Oakphu khua cu SAC ralkap nih hmunhma zohfelnak kan tuah ti in May 2, zaanlei suimilam 6:00 hrawng ah an luhhnawh i tar le nausem pom lio nu telh in khua mi 10 cu an thah hna leng ah mino 2 cu ralphaw ah an tlaih hna, tiah theih a si.Nizaan ah Sagaing ramṭhen Buhtalin (ဘုတလင်) peng Oakphu (အုတ်ဖို) khua cu SAC ralkap nih an luhhnawh hna. Cu thil a can lio ah a zaam kho lo i, Buddhist biaknak inn ah aa dor mi tar hna le tar hna a thlahtu motor (thawlagyi) khaltu minung 2 le khua mi 8 cu an kahthah hna, tiah tualchung mi nih an chim.
Tar a si cang mi hna cu an thah hna lai kan zumh lo caah cuka hmun ah cun kan chiah hna i, khualeng kan chuah hnu kan kir lei ah cun an rak thah dih hna,” tiah khua mi pakhat nih a chim.Buddhist biakinn inn ah a um mi phung-ki pakhat cu SAC ralkap nih an kah lio ah khua mi,Ma Moe Moe zong phungki pa pawng a phanh ah SAC ralkap nih an kah ve i, Moe Moe cu a nunnak a liam nain phung-ki pa tu cu hliamhma lawng a tuar. SAC ralkap nih an thah mi hna cu an lu ah meithal in an kah hna, tiah tualchung mi nih an chim. Credit: The Chin Post.
Thawngpang dang. SAC hruaitu General Min Aung Hlaing nih tlangcung hriamtlai phu he tonnak ngeiding in April 22 a biachimnak ah sawmnak a tuah chih.Cu kong he pehtlai in Chin National Front (CNF) a dirhmun zeidah a lawh timi he pehtlai in CNF biachimnak nawl a ngeitu Salai Htet Ni biahalnak a si.CNF biachimnak nawl a ngeitu Salai Htet Ni le Khonumthung Burmese biaruahnak The Chinland Post nih Laica in leh chinmi a si.Biahalnak. Hramhram in uknak a laktu General Min Aung Hliang nih tlangcung hriamtlai phu pawl he tonnak ngeiding in an sawmnak hna cungah CNF dirhmun zeidah a si?
Lehnak. A hmasa bik ah, Myanmar ram buainak hi SAC le tlangcung hriamtlai phu hna karlak lawngah a cangmi buainak a si lo. SAC le Ethnic Armed Organizations (EAOs) lawng in tawlrel khawhmi buainak a si ti lo.SAC nih a thokmi buainak hi mipi le SAC karlak buainak a si cang. Mipi zapi kan i telmi ‘Mipi’ le SAC karlak ah a cangmi a si. CNF nih sawmhnak cungah zeibantuk biaruahnak hmanh kan tuah rih lo.Biahalnak. General Min Aung Hliang nih zeibantuk ruahchannak in dah tlangcung hriamtlai phu pawl hi an sawm hna tiah na ruah?
Bialehnak. Ramdang lei hmuhnak ah ramkhel lei ti khawh deuh nak hmuh a duh lawng si loin 2023 thimnak caah mipi hriamtlai phu pawl hrawh dih in daihnak a len khawhnak hnga tiah aa ruahchanmi zong a si ko lai.Biahalnak. General Min Aung Hliang nih tlangcung hriamtlai phu pawl keimah pumpak in ka ton hna lai, cun State Administration Council chungtel pawl zong he tonnak a um lai tiah a rak chim. Zeibantuk a phichuak dah na ruahchan?
Bialehnak. A mah pumpak in ton, State Administration Council phu pawl he ton zong aa hlei lo. A khat dihmi a si ko. Kan duhmi kan ngah kho lai maw ti kan chim a si ahcun, tonnak a um hlan ah ram pumpi khoika hmunhma hmanh hrelh loin kahdaihnak um seh tiah kan hal ahcun SAC nih a cohlang lai maw? Cucaah ruahchanawk zeihmanh a um lo.Biahalnak. Tonnak a kai duhmi tlangcung hriamtlai phu hruaitu chung in minung pahnih cu May 9 ah a hnubik thawngthanhding tiah SAC hruaitu nih a chim. CNF nih tah tonnak kaiding in min cazin pek nan i tim maw? Bialehnak. Hi kong he pehtlai in biaruahnak kan tuah lo. Kan tuah rih lo.
Biahalnak. A dangdang chim chap na duhmi a um maw? Bialehnak. A tubantuk sawmnak kong he pehtlai in tlangcung hriamtlai phu si hna seh, mipi hriamtlai phu si hna seh, hramhram uknak hrawh cikcek ding cu kan i tinhmi a si ko caah mipi le a dangdang phu hna nih lungawṭawm ding zeihmanh a um lo. Kan zulhmi lam cungin i ṭhencheu lo le lungrual tein kan kalṭi a hau, SAC sawmnak ruangah kan lung a buaiding a si lo, kan dirhmun a feh hau tiah chim ka duh. Credit: The Chinland Post.
Leave a Reply