MIPI KANRALKAP PAWL NIH RALHRANG TILAWNG KAP DING IN TIMH CIA AN SI

Sagaing ramṭhen chung mipi an umnak khua hna faak ngai in a cawlcang mi SAC ralkap tilawng kahdohnak ding caah hriamthil timhcia in kan um cang, tiah Yinmapin peng Daung Luhlin PDF nih nihin May 31 ah an thanh. Chindwin tiva hrawn ah ummi khua hna mei khangh in a hrawktu SAC ralkap tilawng dohnak ding ah Daung Luhlin PDF cu timhcia tein kan um cang, tiah Daung Luhlin PDF nih anmah social media ah an langhter.

Daung Luhlin PDF nih an thanhmi le an langhtermi hmanthlak ah anmah tein sermi kutser hriamngan le hriamhme hna zong an langhter chih. Uknak latu SAC ralkap hna nih Sagaing ramṭhen chung ah hriam thazaang faak tuk hmang in, vanlei in kahdohnak an tuah lengah mizapi umnak khua hna cu meikhangh in an hrawhpiak hna.

Relchih.Chin ramkulh Thantlang khuachung inn cheukhat a kaang rih lo mi hna cu SAC ralkap nih May 24 le 26 ni ah an khangh ṭhan caah inn 135 a kaang chap tiah Thantlang Placement Affairs Committee-IDPs help(TPAC) nih May 31 ah a thanh. A luancia May 24 le 26 ahkhan Thantlang khuachung Sianginn sang le Zunghmun sang inn hna cu SAC ralkap nih an khangh than. Sianginn sang inn 116 le Zunghmun sang inn 19 tiin a dihlak inn 135 an khangh ṭhan tiah TPAC nih a thanh.

Uknak latu SAC ralkap hna nih Chin ramkulh Thantlang khuachung cu a luancia 2021, September thla in May 26 tiangah voi 28 mei in an khangh. Thantlang khuachung Biakinn 8 telh in, inn 1500 hrawng cu a kaang cang. Inn 2000 leng hrawng le minung 10,000 hrawng umnak Thantlang khuachung ah SAC ralkap nih kahdohnak an tuah caah le khuachung inn an khangh hna caah, khuachung mipi dihlak cu 2021, September thla in Mizoram le ramri khuate lei ah an zaam hna.Crd;The chin post