Mizapi Umnak Lei Hoih In Hriamngan Kahnak Kongah Duhlo Langhternak. 2021 February 1 ni thok in mizapi sin in uknak an kan chuh i rampi ngawlngaihnak hramhram in a lami Min Aung Hlaing le a ralhrang ralkap hna nih mizapi umnak hmunhma lei tinh in hriamngan duhpaoh in an kah mi cungah CDF Hakha Council nih fak piin duhlonak kan langhter.
2022 January 9 ah ralhrang nih Rungtlang in hriamngan an kah mi cu Nabual khuachung ah a tla i inn, lo a rawh pin ah nu pakhat hliamhma a pu. 2022 March 6 ah ralhrang kahmi hriamngan, Hniarlawn khuahlun khuachung ah a tlak ruangah nu pakhat hliamhma a tuar.
Cun 2022 August 10 ah ralhrang kahmi hriamngan nih Hniarlawn khuahlun Pi Chia Hnem inn cungah a tlak caah a nunnak a liam. Hakha peng chung ah ralhrang kut in inn 30 leng a rawk i mipi 6 ralhrang kut in an nunnak a liam. Ralhrang nih mizapi cungah an kan tuahto hi ruah tikah lung a fak ko. Cucaah mizapi kut ah nawlngaihnak a phak hlan tiang lungrual tein Min Aung Hlaing le a ralhrang ralkap hna hi doh ti hna usih.
Cun CDF Hakha cu mizapi humhim kilvennak caah dirhmi a si bantuk in ralhrang nih mizapi tlerhnak caah mizapi lei hoih in hriamngan a kah mi hi fak pi in kan doh. Hi hnu hmailei cu fak deuh in hma kan lak cang lai caah mizapi zong fimkhul tein thut dir i umkal i ralring hna usih tiah CDF Hakha Council nih cathanh an chuah.
Tuni thilcang. Nihin August 10, zinglei sml. 10:30 hrawng ah Hniarlawn khua ah SAC ralhrang bomb a thlak caah kum 55 hrawng a simi Pi Chia Hnem a nunnak a liam, tiah khua upa pakhat nih The Chin Journal ah a chim.Nihin zinglei sml. 8:30 hrawng ah khan Vuanci Inn le Khayaing Zung ah kahdohnak a chuak i SAC ralhrang nih Hniarlawn lei ah bomb voi 2 an kah hi a si.
Hniarlawn khua upa pakhat nih, “Kan khua ah bomb voi 2 a rak tla. Hakha lei kap Block (1) ah a tlami nih inn a khen i, innchung ah a ummi Pi Chia Hnem a nunnak a liam. Cun, a dang pa pakhat zong a baan ah hliamhma a pu,” tiah a chim.Hniarlawn khuachung ah bomb a tlak caah khuami cheukhat an zaam hna i a dang innchung ah thinphang in an i dup hna.
Atu cu a nunnak a liammi Pi Chia Hnem ruak humh ding in kan i thawh cio cang ko hna,” tiah a cunglei upa nih a chim chap.Kan hnu July 25 zong ah khan Hniarlawn khua ah SAC ralhrang an phan i Mucu siangngakchia vung lak ding in a kalmi Salai Mang Lian Sang cu khuachung ah meithal in an kah caah a nunnak a liam. Credit: The Chin Journal
Leave a Reply