Puahkehnak A Chuahter Khotu Thilri Le Minung 3 Cu Mizoram Palik Nih An Tlaih Hna. Mizoram, ramkulh Aizawl khuapi in a chuakmi motor hna cu Serchhip palik phu nih Sailiamkawn check gate ah nihin August 10, zinglei ah an check hna i, culio ah cun motor pakhat chung ah puahkehnak a chuahter kho mi thilri tampi an tlaih, tiah theih a si.
Mizoram palik nih cathanh an chuah ning ah, motor pakhat chung ah cun Gelatine Neo Gel- 7800, Detonator 4063, Fuse 700 meters le motor khaltu Sanglianthanga leng ah motor a zultu Hakha peng le Thantlang peng in Pu Pasui le Van Cung Nung cu an tlaih hna, tiah theih a si. Credit: The Chin Post
Thawngpang dang. Khualeng ah i Kah Ding in CDF-Hakha nih SAC Ralhrang Challenge. Sualnak ngei lo mipi khawndennak a um lo nakding khualeng ah i kah ding in CDF-Hakha nih nihin August 10 zaanlei ah SAC ralhrang cu an hun zuamcawh hna. SAC ralhrang nih nan ngamh taktak a si ahcun mipi innlo le nunnak a hnorsuan lo nakding hmun khualeng ah rak chuak u law kan i kap hna lai,” tiah cathanh ah an langhter.
SAC ralhrang ruang ah Hakha peng chung ah inn 30 hrawng a kaang cang i, minung 6 zong an nunnak a liam cang, tiah an langhter.Ralhrang nih mizapi cung ah an kan tuahto ning hi ruah tik ah lung a fak ko. Cucaah, mizapa kut ah rampi nawlngeihnak a phak hlan tiang lungrual tein Min Aung Hlaing le a ralhrang ralkap hna hi doh ti hna u sih,” tiah mipi sin ah sawmnak zong an ttial chih.
Hakha-Thantlang karlak Timit ah ral lei entainak a linhsat bang in aluancia August 2 thawk khan Hakha khuachung le khualeng ah CDF-Hakha ralkap hna nih kahdohnak pehzul in an tuah. Nihin August 10 zinglei zong ah Hakha vuanci inn ah hmun a khuarmi SAC ralhrang le Khayaing palik zung i SAC ralhrang pawl cu CDF-Hakha nih an kah hna.SAC ralhrang nih miakpi in Hniarlawn lei ah voi 2 an kah i, Hniarlawn khua Block (1) ah a ummi inn pakhat chung ah a tlak caah Pi Chia Hnem a nunnak a liam, tiah thawngpang kan theih. Credit: The Chin Journal.
Leave a Reply