NAN KHUA AH KIR CANG UH, A KIR LOMI HNA CU

Tanintharry ramtthen, Tanintharry peng, Thandar khua ah SAC ralkap nih inn an hrawh ruangah ral a zaam mi mipi hna cu nan khua le nan inn cio ah nan tlun lo ah cun PDF zoh in kan in zoh hna lai tiah SAC ralkap nih an hro hna tiah theih a si.April thla thokka in Thandar khua ah SAC ralkap le mizapi vengtu ralkap karlak ah kahdohnak a chuak.

SAC ralkap nih mipi inn 3 an rak khangh i Mipi hna an zaam hnu ah SAC ralkap nih khuachung inn cu an bauh hna i thil mansang deuh hna cu an lak pin ah satil hna an thah i an ei hna tiah theih a si. Khuachung cu an hrawh dih caah khuami a hohmanh tlung an ngam lo , Mipi hna cu nan rak tlun lo ah cun PDF hmuh in kan in hmuh hna lai i tlaih nan si lai, nan inn hrenhkhar piak nan si lai tiah an hro hna , mipi cu a hohmanh an tlung ngam lo tiah Tanintharry khuami pakhat nih a chim. Credit: The Chin Post

Thawngpang dang. Sagaing ramṭhen, Yinmarbin khua in rallam a sialmi SAC ralkap pawl cu May 15 zinglei ah PDF nih bomb an puahhnawh hna, tiah theih a si.Yinmarbin in Monywa lei ah rallam a sialmi SAC ralkap pawl cu Yinmarbin peng chung ah kan kah hna caah SAC ralkap 5 an thi, tam ngai hliamhma an pu,” tiah Brother Defense Force in chim phuannak nawlngeitu pakhatnih a chim.

Zing sml 11:30 hrawng ah bomb in kan puahhnawh hna, hliamhma a pu i an chiahta mi SAC ralkap pawl nih Ywathaywa khua an khangh. Cuka hmun in meithal an kah thluamah hnuah Nguangpinkyi khua in Monywa lei ah an kal. Kanmah lei in a thimi le aa hliammi kan um lo,” tiah a chimchap.

Cu kahdohnak ah Brother Defense Force(BDF), MRDA, Salinkyi-PDF le Brother-PDF hna an i bawm, tiah theih a si.A luancia May 8 lioah Shwepan khaing khua sianginn ah umhmun khuarmi SAC ralkap 80 hrawng cu, ṭangṭi phu hna he hriamngan in kan rak kah hna, tiah Brother Defense Force nih cathanh an chuah.