SAC Ralkap Nih Yee Oo Peng, MonDaingPin Khua Mi 30 Tluk An Thah Hna. Sagaing ramtthen, Yee Oo peng MontaingPin (မုံတိုင်ပင်) khua mi 30 hrawng SAC ralkap nih an thah hna tiah khua mi hna sin in theih a si. SAC ralkap hna cu May 10 ah Yee Oo peng, Mon Daing Pin(မုံတိုင်ပင်) khua ah inn an duah pin ah meikangh mi khua mi ruak 17 le kuan hma in a thimi ruak 2 hmuh an si tiah an chim.
Nihin May 13 zinglei ah Mon DaingPin khua ah meikhangh in thah a tongmi hna ruak hmuh chap a si tiah YeeOo PDF nih an chim. SAC ralkap nih Mondaingpin khua mi hi 40 hrawng an tlaih hna i 30 hrawng an ruak hmuh a si cang, a dang an kawl cuahmah hna. Inn chungah sualnak ngeilo mizapi ruak cu hmuh an si.
Cheukhat cu tikhor chungah an hlawnh hna i a cungah facang zi tehna an buk chih i an duah hna, An thi hna cu vawlei an chilh hna i An ruak hna cu inn chungah an chiah hna i mei an duah chih hna tiah theih a si. PDF uniform an hruk hna i PDF kan thah hna tiah an langhter. Cheukhat inn ah cun minung 2 khua an sak nak hna ah ruak 6 hna a si tiah khuami hna nih an chim.
Cabia dang. Ka Pute Ngun San Aung, na chungkhar kan ningzahnak kong na tupa nih cakuat in kan theih ter. Chin ram mipi an kan that tu, sualnak ngei lo Chin minung le ngakchia hramhram in a tlai hna i a that tu hna a simi le Chin ram kan innle lo a khaang dih tu hna SAC ralhrang na dirkamhnak hi kumkhat cu a hun tling ve ko cang.SAC ralhrang nih Chin ram Zohkhenhtu ding timi rian an i pek lio ah chungkhar lei nih kan duhlonak kan rak i chimh cio. Chungkhar meeting kan tuah hna i hmunkip in kan i chawn hna, Chin ram le Chin mipi hmai kan khap lai lo e, hmailei dirhmun zong zoh pah rih ko law atu rumro ahcun SAC sawmnak le fialnak hi cohlang duh hlah rak ti cio na si.
A si nain chungkhar le hawikom bia zei ah na rel lo i “Keimah nawl a si ko, nan duh le ka hlaw uh ti tluk tiang in na hmuarka in bia a rak chuak. Na pumpak nawlngeihnak kha kan i hnorsuang ngam lo i faktuk in kan i el ngam lo ticu nangmah zong nih na theih ko lai. Cun atu ah zoh tuah, Matupi sualnak ngei lomi nung zeizat dah an thi cang.Matupi khuapi le a pawngkam khua zeizat dah kan zaam cang i kan innle lo zeizat riamruam dah a kaang dih cang. Thangtlang khuapi a ning in a kangh khi na hmuh ko i kan Chin minung hawi thah an si cuahmah mi na hmuh ko bu ah nangmah cu SAC ralhrang cabuai ah uico fate bantuk in an hnu na zulh hna i na thudir peng rih ko.
Nangmah cu leng ah na chuak lo, Chin mipi hmai ah na langh ngam ti lo caah zeitluk in dah na chungkhar, na tufa le kan ningzah ti hmanh a ruah awk na hngal ti rua lo hi ta. Ka Pute Ngun San Aung, kan nih na tufa le na chungkhar neihniam cheukhat cu Chin mipi hmai hmanh ah pei kan chuah ngam ti lai lo hi. Chin mipi thisen vialte na kut ah aa neh dih mi nih kan mah zong an kan cemh ve sual ko cang lai hi ta.Kan nun bu in nan kan thah dih ko cang, na chungkhar cu kan nung nain mipi thinlung ah kan thi dih ve cang. A caan ahcun keimah te in i thah lawlaw hmanh hi ka lung a chuak cang. Zeitin dah Sahrang ah nai ser khawh i Sahrang nunnak chung ah sahring ei in na um ve khawh ko.
Fak pi in khuaruat law, a tu lio caan ah SAC ralhrang na zaam tak ahcun Belnang nan kan thuh mi vialte na hawh than dih law si loin, Chin mipi nih an i lawmh tuk lai i SAC ralhrang taang nak in na chan a sau deuh lai. Zaangfah tein na chungkhar zawn le na tufa le kan zawn kan ruat hram ko tiah kan nawl ko. Note: Hi Cabia hi kan mah catialnak Page ah Messenger in an kan kuat i tar piak ding in an kan fial mi asi. Credit:VOM
Leave a Reply