Nule Ni Kong He Pehtlai In Phung 31:30 Sihmanhsehlaw Bawipa a tihmi nu cu thangthat asi lai. Hlan lio Mirang pawl nih mi thinlung a khoih cemmi biafang pathum an thim hna. Cu hna cu nule (mother), inn ( home) le vanram ( heaven) hi an si. Nule ti biafang nih a hrinchinmi hna zong an ngei len, tahchunhnak ah, mother-land (chuahnak ram), mother-tongue (chuahnak hawlh) le mother- church (itelnak lhrihfabu) hna.
Cucaah Mirang pawl nih cun “Nule” timi cu tuanpin an rak uar hrim ko. Curuangah Greekmi nih nule upatnak hi February thlachung paoh ah an rak tuah. A Lai-chan lio ( Middle Ages) lio zongah ‘ Nule Zarhpi Ni'( Mothering Sunday) an rak tuah cang. A bik in khua dang i rian le ca ava cawngmi hna an inn an tlun caanah sapesial in biakinn ah pumhnak an tuah.
Cu ni ahcun an nule caah changreu le thil dang laksawng an cawk i an rak peek hna. United Kingdom ( Mirang Ram Kawmh) zongah hlanpi khan nule upat puai kha Thawhthan puai hlan ni 40 chung i a vawilinak zarh ah an ngei ve ( Fourth Sunday of Lent ni ah) ti asi. America ram tu ahcun kum 1914 kum ah rampi tamadah Woodrow Wilson nih ” Nule Ni” cu May thla zarh hnihnak paoh ah ramchung dihlak ah tuah siseh tiin nawl a rak chuah.
Cuti a chuahnak zong cu ” Nule Ni,”um ding in arak buaipi tu nu fa hna ruangah asi. A nu min he a fanu min he Anna Jarvis an ti veve hna. A nu nih nule ni um ding hin saduh a rak that i bia le ca in vawi tampj a rak i zuam. Thla zong a cam lengmang. Apa cu Methodist pastor a rak si. Anih cu Sunday School a rak chim. A fale zong hi nule upat tlak an si caah pale bantuk in upat ve ding an si ti a chimh hna.
Cun an fale kha innah Baibal Chung In Nule Hna ti kong a cawnpiak hna. Khakha i sehchih in a fanu Anna Jarvis nih Nule Ni tuah ding in a buaipi than ve. A nu thihnak kumhnih tlinnak ni May 12,1907 ah an biakinn ah nule upatnak ni a tuah ter hna. Amah bak nih a nu nih arak uar tukmi Carnation pangpar rang 500 a hluut i nule paoh an rak tonh ter hna. Mah hnu khan nule ni kong cu hmunkip ah thok le tuah asi i a netnak ah an tamadah nih nawl tiang a chuah phahnak asi.
Hihi a tawinak tein kan hngalh cia zong asi ko lai nain ka van langhter duhmi asi. Baibal ah tuah u ti a um lo nain atu kan chan ahcun ramkip le khrihfabu kip nih May thla zarh hnihnak paoh ahcun tuah asi. Nule cu a zei si paoh ah upat pek ding an si dih. Asinain Baibal nih cun Bawipa a tihmi nu hi thangthat ding an si ati. Jesuh zong nih vailam cung in a nu Mary a upat zia le a zawn a ruah zia a langhter ter ko khah.
A bia van rel hmanh usih. Cuka i a nu le a dawtmi a zultu an dir ko kha a vun hmuh hna i a nu cu, Ka nu, khaka ah khan na fapa a um khah, tiah a vun ti, a dawtmi a zultu zong cu, Khaka ah khan na nu a um khah, tiah a vun ti ve, Johan 19:26,27. Mirang ahcun ka nu ti asi loh, woman ti asi. Lai holh cun nu ti asi. Hi ka zawn i nu timi hi a Greek holh i kherhlai tikah a hmanmi biafang nih hin tizah le upatnak lei a hoihmi a nem tuk mi bia dawh asi an ti.
Chim duhmi cu Jesuh nih Mary kha a thih lai ah a sia a herh tuk hringhran. Cucaah nemten a chawnh. A naule dang zong an um nain Mary, a nu caah a tha bik ding a hmuh caah Johan kha tavuan a peknak asi tiah thlarau pale hna nih an ti. Jesuh hrimhrim nih a nu a upat i a dawt tukbantuk in kannih zumtu hna zong nih kan nule cu zungzal in kan dawt hna i kan zawnruah hna ding asi.
Nule ni i laksawng kum khat vawikhat thenh men i rinh phung asi lo. An thih hlan chung upat hna usih, daw hna usih ti sawm bu in i din rih ning. Bawipa nih nule a daw i a thlumhalhtu fale le tule kan sinak lai thlua kan chuah piak ko seh. Amen and Amen!!! Nule ngei na hawile share ve hna mu. Credit: Thio Za
Leave a Reply