ASEAN nih National Unity Government(NUG) ton ding ah Malaysia cozah nih biatung a dirh lai, tiah theih a si. ASEAN biahren(agreement) 5 cu SAC ralkap nih a zulh duh lo caah ASEAN nih NUG ton ding ah biatung kan dirh lai, tiah Malaysia Foreign Minister Datuk Seri Saifuddin Abdullah nih a chim.
ASEAN nih a dang cozah cohlan nak ding caah biatung kan dirh a si lo. Asinain ton biaruahnak sawhsawh lawng a umnak Myanmar ram, mizapi hna caah zei tin dah bawmhnak kan pek khawh hna lai ti cu ruah a hau tiah a chim chap. May 5 ah ASEAN Foreign Ministers tonpumhnak cu tuah an i tim i cu tonpumhnak ah NUG he tonnak ngeih ding cu Malaysia nih biatung a dirh lai.
Myanmar ram mi hna bawmh nakding le Myanmar-ASEAN pehtlaihnak (Myanmar Ambassador) kongkau zong Malaysia nih ceihmainak a tuah lai, tiah theih a si. Atu tiang ah SAC ralkap nih ASEAN biahren cu a zulh lonak kong Malaysia Foreign Minister nih cun a chim. Cucaah Myanmar- ASEAN pehtlaihnak a ṭhat khawh deuh nakding lam zong an ceihmai lai, tiah theih a si.
Relchap. Sagaing ramṭhen, Myinkin peng ah Khah-Lah-Yiah 87 in SAC ralkap 150 hrawng le mizapi vengtu ralkap kahdohnak cu April 25 in 28 tiang a chuak i, SAC ralkap le Pyo Saw Htee tam ngai an thih caah SAC ralkap 30 hrawng lawng an taang i hnu an tolh, tiah MDF Special Force sin in theih a si.Cu SAC ralkap hna cu Kalay peng um Battalion an si i rallam an ser pah ah Paan Set(ပန်ဆက်) le Tuang Phyo ( တောင်ဖြူ) khua hna ah Phyo Saw Htee hna cu an i sawm pah i an zapi 190 hrawng an si, tiah theih a si.Hika lei ah helicopter in an chiah mi SAC ralkap hna cu an thi dih. Khuapi chung um mi hna nih le an rat khawh lo caah Kalay khuapi um SAC ralkap hna cu an rak thlah hna.
April 25 ah Than Pauh khua in kahdohnak aa thok i Chindwin tiva ral um Paan Set le Taung Phyo i phyo Saw Htee hna cu bawmtu ding ah an auh hna. Kahdohnak cu suimilam cheu chung a rau i, Bomb an i lamh pah caah SAC ralkap lei in ke kiak le kut kiak zong an um.SAC ralkap hna cu aukhuan pah in tiva ral ah an zaam ṭhan hna i, a thi mi zong an tam caah Luang Pyih khua lei ah hnu an tolh i Than Pauh khua cu mei in an khangh, tiah Myanmar Defense Force Comando Battalion in chimphuannak nawlngeitu nih Yangon khit thit ah a chim.
Cu SAC ralkap hna cu MDF Special Force, DRPA, Sagaing PDF Battalion 3, Swe Bo pengkomh Battalion 9, KPDF 1, Pah Kah Phah le Ṭangrual phu hna i bawm in an kahdoh hna.Yin Kalay khua pawng zong ah April 26 zinglei ah khan mizapi vengtu ralkap phuruk fonh nih SAC ralkap cu bomb an puahhnawh hna i, SAC ralkap 21 an thih lengah tamlakte hliam an tuar, tiah DRPA nih cathanh a chuah. SAC ralkap hna nih cun Yin Kalay khua cu mei in an khangh i, thilri an hrawhhral mi zong a tam, tiah theih a si. Credit: The Chin Post.
Leave a Reply