Paletwa mipi hna nih SAC he rianṭuanṭi lo ding in IKACC nih forhfialnak a tuah.Chin ramkulh, Paletwa peng ah a ummi mipi hna nih SAC telh in a kuttang phu pawl he rianṭuanṭi le thawngpang pek lo ding in Interim Khumi Affairs Coordination Council (IKACC) nih July 24 ah a thanh.Cubantuk SAC kuttang phu pawl he fonh in thawngpeknak hna a um caah Paletwa mipi 6 AA nih a tlaih cang hna tiah theih a si.
Cu kong he pehtlai in IKACC cathanh chungah “Tlaih a tongmi Paletwa khuami 6 an himnak, an tlaih hna lio caan chungah chungkhar he ton khawh nak le a caan a tlin tikah luat ṭhan khawh nak hnga AA he hnatlaknak kan ngei” tiah a ṭial.IKACC phu hi hramhram uknak hrawh, Federal Democracy ramkomh sernak le Paletwa peng luatnak caah rian a ṭuan cuahmah mi phu a si tiah an langhter.
Tlaih a tongmi hna an min, an umnak a fiangte cu AA le IKACC nih an thanh lo.Paletwa hmunhma ah SAC ralkap le AA karlak entainak a fak i a luancia July 24 zongah Abaungtha khua pawngah kahdohnak a rak chuak.Cu kahdohnak hnu ah SAC nih khuami le khuabawi cheukhat a tlaih hna i AA zong nih SAC ralkap thawng nan pek tiah khuami cheukhat a tlaih ve hna.A luancia 2019 November 3 ah NLD palai hlun U Wai Tin cu AA nih an rak tlaih i thlahnih hnuah an thlah ṭhan.
Relchap. CDF-Mindat nih khua khat le khua khat pehtlaihnak hlei an sak.Chin ramkulh, Mindat peng khua 1 le khua 1 pehtlaihnak ah an hman tawnmi hlei hmete a rawkmi cu CDF-Mindat battalion 1 nih an remh tiah theih a si.Kanmah hmunhma a chuakmi harnak cu kan harnak a si ve. Dothlennak ah ah hriam a tlaimi lawng siloin lam, hlei hna a sami rianṭuantu zong kan si chih timi ruahnak he an i teltum mi a si tiah theih a si.
Kanmah hriamtlai pawl hi fur chung cu kan i din lo ti khan a si. Cheukhat nih kahdohnak caah timhtuahnak an ngeih bantuk in cheukhat nih mipi caah rianṭuan a si. Mipi nih bochan mi si kan i zuam peng lai tiah CDF-Mibdat Battalion 1 nih a langhter. Credit: The Chinland Post.
Leave a Reply