PASALTTHA PDF PAHNIH LE KHUAMI PARUK AN THAH TTHAN HNA E

Apoituk e, ralhrang kawlralkap hna nih mipi ralkap pahnih le khuami minung paruk an thah hna. Sagaing ramthen Chaung Oo peng Kaan Gyi khua ah ummi a khuarmi ralhrang kawlralkap le ralhrang hnuzul Pyu Saw Htee hna nih Nizan June ni 7 suimilam 7 hrawngah mipi ralkap PDF pahnih an tlaih hna.

Culawng siloin khuami minung paruk an tlaih rih hna. Cu an tlaihmi hna cu ralhrang kawlralkap hna nih an thah hna tiah CHU PDF sin in theih a si. Ralhrang hna nih an thahmi PDF pahnih hi Chaung Oo peng mipi ralkap chungin Chaing Ko le Nandah an si. Adang minung paruk hi khuami an si tiah theih a si.

Hi konghe pehtlaiin Chaung Oo peng mipi ralkap PDF nih ngaihchiatnak a tongmi chungkhar sin ah an ngaihchiatnak zong an langhter. Ralhrang ukpennak hrawh timh in doh cuahmah lio ah a tubantukin nunnak a liam hi a poituk hringhran. Nan lo hma cu kanmah nih kan rak pehzulh lai tiah biakamnak an tuah.

Relchap duhmi caah. Ukraine le Syria ah a thimi Russia ralkap chungkhar hna cu Ruble 5 millions pek ding in President Putin nih June 6 ah khan minsen thutnak a ngei. Cu nawlchuahmi cu Rogvadia tiah hngalh ciomi bodyguard ralkap theihpinak le cohlannak a si i, Rogvadia cu Russia caah special force an si i, Ukraine kahdohnak ah zeimawzat an thi.

President Putin sinah direct in thawngpang peknak nawl a ngeitu special force cu a liamcia Kum 2016 ah khan rak dirh a si i, dai tein cozah duhlonak langhter in lamzawhtu hna cu ṭhencheu dingin Russia ramchung ahcun an hman hna. Ukraine ram luhhnawh in kahdohnak caan chungah Russia ralkap 1351 an thih pinah 3825 nih hliamhma an tuar tiah March 25 ah khan cathanh an chuah nain cu hnu pinlei ahcun a thimi le hliam tuarmi hna zat hi cathanh an chuahmi a um ti lo.

Ukraine le nitlaklei ram hna nih cun Russia ralkap a thimi zat hi an chimmi nakin alet in an tam tiah an chim ve. Russia ralkap hna nih Ukraine khualipi Kiev le khuapi bik changtu Kharkiv hna cu laak ding in kahdohnak an tuah nain an ruah ningin hma a kal lo ruangah hnulei an i zukphiat i, atu ahcun nichuahlei Donbass lei ah faak ngai in kahdohnak an tuah ṭhan.