Chinmi ramkip a ummi vialte hna nih Saya Zo Ram Sang caah thlacamnak in bawmcio hna usih. Aa khawnning a fak ngaingai i, a tu hi sizung ah an zoh khanh cuahmah lio a si. A nung kan Biak Pathian nih damnak tlamtling pe hram hram ko seh. A sining kongah a mah nih a tanglei bantuk in a langhter.
Pumpaak in thawng a ka halmi le a ka hraamtu nan cungah kaa lawm tuk. Kai hliam ningcang hi pumpaak cio leh ahcun ka baat tuk caah hika hin ka vun langhter lai. Thilri kan cawkmi kha kan philh i va laak ṭhan dingin kan kal tikah, cuka kan va kalnak pawng cu inn a kaang i kan va zoh ve kan ti i, keimah daithlaan ah innkangmi lawng kha ka zoh i ka hmailei lam zoh ti loin,
kan kalnak kha inn dotkhat an sakmi cungah asi i a ṭuang an phah thlu lomi ka hmu ti lo i ka va lan. Thih ding hmanh asi nain Bawipa nih ka nunnak thih cu a ka sian rih lo. Ka khel in ka tlaak caah ka khenruh ai cheu/kakning a faak ngai.Ih bu in kheel lehchawm le zun/ek fim hau ka si tikah a fawi lo. Miramdang a si fawn tikah minung lei ruahnak cun lungre a thei hringhran ko. Atu ka sining hi a faak ngaimi dirhmun ka phaak caah faak piin thlacam rak ka bawm hraam ulaw.
Thawngpang dang. Mandalay ramṭhen, Kyaukpadaung peng, Bote khua ah mizapi vengtu ralkap PDF 2 cu SAC ralkap nih an tlaih hna i, a luancia June 4 ah an nunnak an laak hna, tiah khuami hna nih an chim. Bote khuami kum 20 hrawng mino pahnih, Minchan University a kai lio mi siangngakchia Hein Zeyar Phyo le Hein Zeyar Oo hna cu ramlak ah an ruak in hmuh an si i, meithal in kah an si,” tiah an ruak a hmutu pakhat nih RFA nih a chim.
Mino pahnih hna cu sianginn an kai ti lawng kan theih i PDF an si kan hngal lo. An tlaih hna hnu ni 3 nak zinglei Sml 4:00 hrawng ah atu bantuk in an ruak char a si. Tlaih an si lio ah hin chungkhar lei zong nih tonnak nawl an ngei lo i, Khuami zong thawng an kan thanh lo. Hein Zeyar Oo cu a lu ah an kah i, Hein Zeyar Phyo cu a thin zawn ah voi 3 meithal kahnak hmuh a si.
A luancia June 2 ahkhan mino 2 hna hi Letpan Phya khua lei ah rawl an va ei lio ah Letpan Phya palik nih an rak tlaih hna i, an phone chung ah PDF he a pehtlai mi an hmuh tiah an chim. Cu hnu ah an 2 cun Palik sakhan in Tatmah 99 ah an kuat hna i ramlak i rallam riakbuk pakhat ah hri in an ṭem hna i, an kahthah hna tiah an ruak a hmutu nih cun a chim.
Relchap. Myanmar ramchung ah May 7 in June 6 tiang thlakhat chung kahdohnak ah SAC ralkap 2,000 leng an thi i, minung 539 hliam an tuar, tiah NUG Ministry of Defense nih an thanh. NUG cozah dirh kumkhat a tlin tiang ah mizapi vengtu ralkap battalion phu 257 dirh a si cang, pengkulh 250 ah tualchung hriamtlai phu cu ṭha tein kan dirh khawh cang, cupinah tualchung hriamtlai phu 400 leng he hmunkhat te ah rianṭuanṭi ding in pehtlaihnak kan ngei cang, tiah NUG nih an thanh. TCP
Leave a Reply