A PALH CANG TIIN, ZEI KA REL TI LOMI BIAPHUAN A TLING ȚHAN AI.Kum 2006 lio ahkhan, Tayakung khua ah Thawngțha chim in zarhkhat kan rak um. Cu lio ahcun, Zankhat cu zanțim ahkhin, Thlarau lei i a țul buai ngaimi, kan farnu Zingte (Tayakung khuami) hi khua lakah a rak au i, “Tayakung khua hi a kaang lai,” tiah a rak au len!
Khua kangh cu kan duh cio lo caah, kan rak i nuam lo ngai hna! Kum 5 kum 10 hnu zongah Tayakung khua cu daite le him tein a um i kan hawi le hna zong Crusade an va tuah țhan tawn. Cucaah, Zingte biaphuan cu aa palh tiah kan ruah.Zingte nih, Tayakung khua a kaang lai tiah, khuapi theih in a rak au i a tling lo,” tiah ka hawi le voi tam nawn ka chimh hna.
Kum 2021, Kalemyo le Tayakung hrawng i kah dohnak tete a hung um tikah, “Aa palh” tiin, zei ka rel ti lomi, Zingte biaphuan kha a tling sual lai ti ka phan caah Tayakung khua caah nawlnak thla zong ka cam tawn. Sihmanhsehlaw 2022 August thla ahcun kan duh lo bu tein, Zingte biaphuan bang Tayakung khua cu a hung kaang taktak ko ai!
Zei i ka rel ti lomi biaphuan, “A palh cang,” ka timi biaphuan a tlintertu cu BAWIPA PATHIAN a si. Hi nihhin, keimah lila zong thazaang tampi a ka pek țhan!Zeicahtiah, midang i an biaphuan hna cu va um rih ko hna seh, keimah sin hrimhrim ah, THIANG THLARAU nih fiang tukin kan Miphun kongah a ka chimhmi hna le hmuhter mi hna kha, caan sau ko cang hna hmanh sehlaw an tling hrimhrim lai ti hi a ka hngalhter nolh țhan caah, kaa lawm!
Kan Miphun caah a țha lei biaphuan tlawmpal: Pakhatnak. Atu, “Chin Miphun nih kan dohmi hi khuachia a si i kan tei hrimhrim lai.” Hihi Mang Vision in ka hmuhmi a si. Pahnihnak. Țhanghnak nganpi a tlung lai. Hihi ka ihnak khaanah vancungmi a rungțum i a ka chimhmi a si. Pathumnak. David le Josep bantuk in Thluachuah kan pek hna lai. Hihi THIANG THLARAU nih a ka chimhmi a si.
Kum 2001, BAWIPA rianțuan ka rak i thok ni, a Bia chim awk i lam ka kal cuahmah lioah, van khin, chikhat loah, khuari thawng bantuk in “Kuruung,” tiah, thawng a hung thang i, țek tlak bantuk khin, “TIH HLAH KAN DIR PI LAI,” tiin, khuari le țek thawng bantuk thang in , PATHIAN Bia cu ka hna ah a hung lut i, cu le cangka Țhawnnak le Ralțhatnak in ka khat tuk i țihphannak hrimhrim a um ti lo.
ȚIH HLAH, KAN DIR PI LAI, tiin, BAWIPA JESUH nih, a Fekmi le a Țhawngmi in Bia a ka kamh mi cu nihin ni tiang le hmailei taksa nunnak a dih tiang, ka Țhawnnak le ka Himnak le ka Dir khawhnak cu a si. A kan dawtu, BAWIPA PATHIAN hi a um taktak i a mi hna sinah a THLARAU in Bia a chim lengmang ko.KHRIH sal le a lamkaltu Tluang Lian (Martar)
Leave a Reply