Pathian Orhlei Kam Biathli. Lam 7:55,56 Sihmanhsehlaw Thiang Thlarau in a khatmi Steven nih khan van lei khi a hun zoh i Pathian sunparnak kha a hmuh i Jesuh cu Pathian orhlei kamah a dir kha a hmuh. Aa thawh i, “Zohhmanh u, vancung aa hun i Pathian orhlei kamah Mi Fapa a dir kha ka hmuh,” tiah a ti.
Steven nih vân lei a hei zoh ah khan Orhlei kam a ngeitu Pathian kha JESUH he hmunkhat ah a hmu chih taktak hnga maw? RUALUK Study Baibal ah ka zoh le Pathian orhlei timi tialnâk câng 55,56 le 59 hna cu fianternâk a rak tial lo.Mizo Study Bible ah ka zoh than i, orhlei nih a hmuhsak mi cu, ( thangthatnâk le Nawlngeihnâk ) tiah fianternâk a tuah.
Right hand of God, Pathian orhlei tihi, Pathian thawnnâk, lianngannâk , thiltikhawhnâk ca i tahchunhnâk ah hman mi a si. tiah , Rev. Lalsawma nih a ti ve. Bible Dictionary, cahmai , 152,153 Lam 7 : 59 nâk, Pathian a auh i, “Bawipa Jesuh, ka thlarau cu ka cohlang ko,” tiah a ti lio ah Stephen cu lung in an cheh.( Hakha Bible Thiang )
Steven nih, Bawipa Jesuh ka thlarau hi rak cohlang ko, tiah Pathian a auh lioah lung in an cheh. ( RUALUK Study Baibal ) A fiang mi cu, Luka nih Steven nih Bawipa Jesuh tiah a auh mi cu Pathian a si a ti caah , zei ah an rak rel lo mi Mi Fapa Jesuh cu Nawlngeihnâk le Sunparnâk le Thiltikhawh thawnnâk le Lianngannâk ah a dir cang tinâk si. Credit: John Fready.
Cabia dang. A Kapkap In Cawlcangh Zia Thiam Kan Hau.Pumpak kong si loin ram le miphun kongah kan buai. Khrihfabu pakhat kong si loin mizapi kongah kan buai hna. Ralkap uknak a tem-ing ciami lawngte kan si ngawt hna caah cu uknak chungah kir than kan duh ti lo. Kan lung aa rual; kan lung aa fun i kan duhmi le kan i tinhmi aa khat dih. Cu ruangah kan zapi tein kan buai ti hna. Lang ngai in lam a zawhmi kan um hna lai.
Hmunthur a rak charmi mino zong kan um hna lai. A mui hmuh theng loin a aw lawng kan theihmi zapi zulh ding a autu kan farle zong kan um hna lai. Zapi hmai ah bia a chim khomi le UN le ramdang cozah thawng a rak thanhtu zong kan um lai. Innchung tangte ah thla a rak cammi zong kan um lai. Mizaw a rak zohkhenh i a rak thlopbultu zong kan um lai. Thongtla kongah zapi hmuh loin a rak buai i a cawlcangmi zong kan um lai.
A tlizaammi hna caah lam le sul le dornak a rak tawlreltu zong kan um lai. A kapkap in kan rak cawlcang cio. Atu bantuk ram le miphun le mizapi kong i buainak ahhin a kapkap in riantuan a rak herh timi kha kan i fian cikcek a hau. A chunglei in pehtlaih zia le biakchawnh zia tu kan thiam a hau. Phundang in kan chim ahcun a thapthap in kan um hna i ralkap nih khehkhuai khawh lomi, ciktan khawh lomi le hrawh khawh lomi phu kan si hau.
A leng lawng si loin a chungah kan feh, kan chah deuh i kan hram a hngeh deuh a biapi. Nikhat hnu nikhat zeitindah kan umkal lai i zeidah kan tuah lai i zei lam kan kal ahdah kan i tinhmi kan phak khawh lai timi ruah thiam zong a biapi. Cucu mirang nih ‘strategy’ an timi cu a si. Ralkap zong nih ‘strategy’ a phunphun an hman cang i a hman than lai.
Mizapi zaangdernak, connak le tihphannak dingah a phunphun lam an kawl lai. Thisen zong an luanter cang.Hi pinah a dangdang an tuah rih lai. Asinain, mizapi nih teinak kan hmuh khawhnak hnga a kapkap in, a thapthap in riantuan zia kan thiam a hau ko. Credit: Salai Van Biak Thang
Leave a Reply