Kalaymyo thlanglei ralhrang kawlralkap le mipi ralkap i kahdohnak ah Kalay PDF lei in minung pahnih nih ram le miphun caah an nunnak an pek. Ralhrang lei in a tlawmbik minung 14 an thih tiah an langhter. Nithum chung Kalaymyo thlanglei Yeshin khua pawngah ralhrang le PDF Kalay, CDF KKG, Pahkahphah fonh hna cu nithum chung an i kap.
May ni riat in an i kap i, tuni May ni 10 tiang pehzulh in nithum chung an i kap. Hi i kahdohnak ah ralhrang lei in minung 14 nak tlawmlo an thi i, PDF Kalay in minung pahnih nih ram le miphun caah an nunnak an pek tiah theih a si. Tuni May Ni 10 zinglei zongah Yeshin khua pawngah ralhrang le mipi ralkap an i kap rih.
Ralhrang hna nih hriamnam ngam an hmantuk caah Mipi ralkap lei cu hnu an soh ngaingai. I kahdohnak ah PDF Kalay lei an meithal kuan a dih caah zingka suimilam pakua hrawngin khua an chuah taak i, hnu an soh. Ralhrang le a bawmtu hna cu khuachung ah an lut i inn an khangh tiah an langhter.
May Ni 8 chun hnu ah ralhrang le a bawmtu phusawti hna cu Kalaymyo thlanglei Yeshin khua lei ah Incunn khua lei in phu khat cun Kyanta khua lei phu khat, ralhrang hi minung zahnih renglo hna cu an kal. PDF Kalay le CDF KKG le PAHKAHPHAH hna i bawm in zan suimilam pasarih in pahra tiang an kah hna.
I kahnak ah ralhrang lei in minung pahra nak tlawmlo an thi tiah theih a si. Cun Yeshin khua ah a ummi ralhrang le mipi ralkap hna cu May Ni kua zing suimilam pariat in zanlei suimilam pali tiang khua pawngah an i kap. Nizan i kahdohnak ah PDF Kalay lei in minung pahnih nih ram le miphun caah an nunnak an pek tiah an langhter.
Leave a Reply