Ralhrang nih khuami pakhat an thah pin ah minung pahra hrawng an tlaih rih hna. Nizan August ni 11 zan ah ralhrang kawlralkap hna cu Magway ramthen Pauh peng, Shya Shay Chyat khua ah an lut i, sualnak ngeilo khuami pakhat an thah pin ah midang minung pahra hrawng zong an tlaih rih hna tiah an thanh.
Culawng siloin khua zong ralhrang kawlralkap hna nih an khangh tiah khuami hna nih an chim chih. Hi konghe pehtlaiin khuami pakhat nih a chimmi cu khuachung ah ralhrang an rak lut i, khua an khangh. Cun a zaam lomi khuami hna zong an tlaih hna i an tlaihmi hna hi minung pahra hrawng cu an si lai.
Khuami a zaammi hna zong ralhrang kawlralkap hna nih an kawl cuahmah rih hna. Kum 40 hrawnghrang a simi pa pakhat zong an thah tiah a chim chap. Hi konghe pehtlaiin ralhrang kawlralkap hna nih August ni hra ah khan Ye Thyat khua zong a dihlak in an khangh cang. Khua an khangh hnu ah a tu khua ah hin an lut thil an tuah hi a si.
Thawngpang dang. Kan ralkap hna caah thlacam bawm peng rih hna usih. Atu zong ralhrang kawlralkap le kan ralkap hna karlak ah kahdohnak pehzulh a chuak cuahmah rih. Tuzing zongah Timit lei ah bomb a puak pah cuahmah rih. Culawng siloin Hakha ralhrang kawlralkap hna an umnak hmun a simi Rungtlang sakhan pawng zongah an i kap rih.
Kan ralkap hna an him khawhnak ding le teinak an hmuh khawhnak dingah kan umnak hmun cio in thlacamnak bawm peng hna usih. Nili chung an i kahnak ah kan ralkap lei Bawipa nih a umpi hna i, kan ralkap lei an him dih. Ralhrang kawlralkap lei a thimi an tam ngai cang tiah theih a si. Atanglei hi anmah lei nih nihnih chung kahdohnak kong an thanhmi a si.
Zapi Theihternak. August 1️0 ဝန်ကြီးအိမ်ယာ zing 8:50 ah an va kah hnanak ah ralhrang (3) an khen hna, an mah lak ah (2) cu an thi lai tiah zumh a si. August 1️1 Drone le kan Sniper nih an kah hna caah ralhrang pawl an umnak in Timit lei pangah an zuang. Chunhnu suimilam pakhat ah kan Miphun ralkap hna nih an kal hnawh hna i zaanlei suimilam (2:30 – 4:00) tiang an i kap.
Ralhrang pawl a tlawmbik minung (10) an thi lai! Cu ka zawn an va kah hnanak ahcun ralhrang hna nih an phone, phaisa, power bank le air phone ti bantuk zong an lek tak dih. A herhnak zawn ah dothlengtu zapi lei in bawmhnak a lam kip in pek a si caah kan i lawm. Kanmah lei kan him. Credit: Hakha Campaign For Justice.
Leave a Reply