Salai Peter Thang in CNDF din kum khat kimnak ah Chin miphun hnenih a thucah:CNO ih a tumtahmi Chinram dinsuah ih Federal ram zomkhawmpi a ra suah theinak dingah Chin miphun in ralkap felfai a neih a tulmi cu CNO fehtlang in kan dung kum April 13 ah dinsuah a rak si.Tu-ah CNDF a dinnak kum khat a ti thlang.
Commando 9 te thawn a rak thokawmi cu kum khat a kim ah commando lut zo mi 900 kan kim. Camp pakhatte thawn kan rak thokmi cu Camp 12 tiang kan nei thei thlang. Hriamhrei lam khalah kum khat sungah tampi kan thangso zet. Asinan, kan ralkap tam sawn pawl ih thinlung ah khuahlan kum khatih kan neihmi huaisennak, pumpek duhnak, tlawmngai duhnak, daan pek thlun duhnak a tlaniam vivo.
Kan tumtah kan hloh zik cuahco thlang. Kan thinlung a puan in a lang deuhdeuh. Kan ram le miphun hrangih CNO ih a tumtahmi a tlamtling theinak dingah CNDF (Chin ralkap) a cak sinsin a tul. Kan paraltha pawl an thinlung a tlakniam vivonak san pawl cu kum khat kan kim tiang hriamhrai kim (tha) kan pek thei lo tlunah uniform thlengawk ding hman kan peaw thei lo,
Kum khat sung an tanta mi inn lam hrang zianghman kan tuahsak thei lo hleiah kan ralkap pawl ih phone top-up hman kan thunawksak thei lo. Professional ralkap kan beisei a si ahcun professional vekih kan treat thei kan zuam a tul. CNDF cu kan miphun aiawhtu ralkap an si ruangah an parah kan miphun zate in tuanvo kan nei ti kha kan theihsuak lehsal a tul.
Kan miphun zalen ding ih a poimawh bikmi lakah professional miphun ralkap kan neih thei hi, poimawh hmaisabik a si ti thei tharsal in; kan tithei tawk cio bawm kan zuam cio pei uh. Sumpai le thilri ih a bawm theitu in siang zetin, thazang le awkam (cangan) lamih bawm thei in taimak in, thinlung le thlacamnak ih tanpi thei pawl in catbang loin, tanpinak dang pe thei lo pawl in phunzai loten miphun sinak kilhim phah in CNDF hrang kan zuamtlang cio pei uh.A nung Pathian khalin kan miphun le kan ralkap (CNDF) in bawm hram seh! Amen. Peter Thang, Chief of Staff, Chin National Defense Force
Leave a Reply