RALHRANG AN HRUT DIH CANG, AN GENERAL KHUA ZONG AN KHANGH

Ralhrang nih an mah dirpitu khua zong an hual hlei lo, an khangh dih. Anmah dirpitu khua lawng siloin General U Thar Aye a chuahsemnak khua zong an khangh. Ralhrang nih Sagaing ramthen Budalin chungah khua paruk an khangh caah mipi hna cu a himnak hmun le hma ah an zam dih hna.

May ni 17 ah khan ralhrang kawlralkap motor rual hna cu mipi ralkap lei nih bomb in an puah hnawh i ralhrang minung panga an thi. Mah ruangah pawngkam a ummi khua hna cu ralhrang nih an khangh hna. An khanghmi khua lak ah hin Chaung Wa Pyin khua zong ai tel.

Mah Chaung Wa Pyin khua hi ralhrang kawlralkap dirpitu USDP pawl an tamtuk nak khua a si. Culawng siloin Sagaing ram a rak uktu tthing General U Thar Aye i a chuahsemnak khua a si lawng siloin a farnu zong a umnak a si. A farnu lila zong ralhrang tih in a himnak ah a zam ve. Cun USDP vialte zong an zam dih.

Hi konghe pehtlaiin khuami pakhat nih a chimmi cu Chaung Wa Pyin khua cu ralhrang dirpitu khua a si. An khua hi inn 50 renglo an um i inn 7 lawng NLD an si. Adang vialte cu ralhrang a dirpitu lawngte an si dih. Hur sii an i chun i an lei tang le tanglo zong an thleidang kho hna lo. U Thar Aye a farnu zong khua ah a um lio a si nain atu ahcun anau le inn ah an um tiah a chim.

Thawngpang dang. Ralhrang nih an hnuzul Pyu Saw Htee hruaitu pahnih an thah hna. Shan State, Shwe Pyi May ah a ummi ralhrang hnuzul Pyu Saw Htee hruaitu pahnih hna cu nan rian nan tlamtlinh lo, mipi ralkap sin ah thawng a petu nan thian kho hna lo tiah ralhrang kawlralkap nih an kahthah hna tiah thanhnak an tuah.Ralhrang nih an thahmi hna pahnih hi Kyaw Then le Khin Maung Thein an si.

Anmah pahnih hi khuachung ah mipi lei sin thawngpang a petu pawl nan thianh hna lai tiah rian an pek mi hna asi. Ralhrang kawlralkap hna nih Min Palaung khua ah an auh hna i, biahalnak an tuah hna hnu ah an thah hna.Hi konghe pehtlaiin khuami pakhat nih a chimmi cu hi hna pahnih hi ralhrang kawlralkap sin ah an um peng. Ralhrang nih thawngpang petu pawl an thianhter mi hna asi. Asinain an rian an tlamtlinh lo caah an kahthah hna tiah a chim.