RALHRANG AN LUNGLEN LIO AH PDF NIH 5 AN KAHTHAH HNA

Magway ramṭhen, Myaing peng Kyaukkhuat(ကျောက်ခွက်) zinan rianṭian mi an umnak inn Well 2 ah, umhmun khuarmi SAC ralkap pawl cu May 13 ah kah an tong i 5 an thi, tiah theih a si.May 13 zanlei sml 2:00 hrawng ah guitar tum in hlasa mi SAC ralkap pawl cu kan pel hna i naih tein kan kah hna caah 5 an thi, tiah Black God Guerrilla phu in chimphuannak nawlngeitu pakhat nih a chim.

Zanlei sml 2:00 hrawng ah guitar tum in hlasa mi SAC ralkap pawl cu hriamngan in kan kah hna caah 5 an thi, an ruak cu mei in an khangh colh hna, tiah a chimchap. Cu kahdohnak ah Black God Guerrilla phu, Future Genreation Guerrilla၊ 5.0.2 Guerrilla le a dang PDF hna i bawm in an kah hna i sml cheu chung hrawng an i kap, tiah theih a si. Kahdohnak ah kutser 40 mm, 60 mm le 80 mm hriamngan in voi 20 hrawng kan kah hna i SAC ralkap nih hriamhme in an kan kah ve, tiah Black God Guerrilla phu nih cathanh an chuah. Credit: The Chin Post.

Thawngpang dang. Ralhrang nih raltuknak vanlong hmangin Kalay PDF sakhan an kah ruangah PDF sakhan cu a kaang dih. Tuni May ni 14 zingka suimilam pahra hrawngah ralhrang hna nih vanlong in PDF Kalay Tatzin 4nak sakhan cu bomb an thlak hnawh hna ruangah Kalay PDF nih an sakhan an chuah taak.

Hi konghe pehtlaiin Kalay PDF Tatzin 4nak nih an chimmi cu kannih Kalay PDF tatzin 4nak i kan umnak hmun sakhan cu May ni 14 zingka suimilam pahra hrawngah ralhrang nih raltuknak vanlong pathum le helicopter pahnih nih minute 30 an kah. Culawng siloin tanglei in ralhrang 200 hrawng an ra.

Tanglei in a rami ralhrang hna cu ralbawi Zaya Myo le Than Naing nih an hruai hna i PDF sakhan cu an luh hnawh. Kahdohnak ah ralhrang lei in a thimi an um lai. Hriamnam aa thlautuk caah kannih cu hnu kan soh tiah a chim. Tuni sakhan an lak ahhin cunglei zong in an kah hna.

Cunglei in ralhrang hna nih an kan kahnak ah kan pasaltha hliamtuar zong an um. Asinain a nunnak a liammi cu kan um lo tiah an thanh. Kan umnak hmun hna cu ralhrang hna nih an khangh dih. Ralhrang kawlralkap hna nih Kalay thlanglei cu thlathum chung internet le phone line an phih cang caah duhning in thawngpang theih a si lo tiah an chim chih.