RALHRANG BAWI NGAN PA 1 ANTHAH BAWINGAN 1 LE ANAU LE ANTLEIH RIH HNA

June 2 lio, KNU brigade 1 hmunram Thahtone peng, Wiyaw(ဝီယော်) le Htonebo Lay(ထုံးဘိုလေး) khua pawng kahdohnak ah SAC ralkap lei commander pakhat a thi i, General pakhat le ralbawi (tat-kyat-gyi) dang pakhat cu an nun bu in tlaih an si tiah KNLA phufonh in ṭuanvo ngeitu nih a chim.Nizaan June 2, Htonebo Lay(ထုံးဘိုလေး) khuachung ah SAC ralkap thazaang 100 hrawng cu rallam an sial caah KNLA phufonh he an i kap.

Cu kahdohnak ah cun SAC ralkap commander pakhat sniper kahnak in a thi i, hliamhma tuar zong an tam tiah KNLA phufonh in ṭuanvo ngeitu pakhat nih a chim. Kahdohnak chung ah cun SAC ralkap nih Htonbo Lay khuachung ah hriamngan an kah caah khuami pakhat cu kuan hma a pu i, mizapi umnak le inn zong ah hriamngan an tlak caah innzuat satil Vok le Caw hna zong an thi, tiah theih a si.

Kahdohnak chung ah SAC ralkap khah-mah-yiah 9 in General Kyaw Zin Lat le ralkap doctor (tat-kyat-gyi) Naing Oo cu an nun bu in kan tlaih hna, tiah KNU brigade 1 in chairman Padoe Soe Myint nih DVB ah a chim. An nun bu in tlaih a tongmi SAC ralbawi 2 cu ralkap phung he aa tlak in zohkhenh an si, tiah a chim chap. A luancia May thlachung ah khan KNU Brigade 1 hmunram Thahtone pengkomh ahhin SAC ralkap le KNLA phufonh karlak kahdohnak voi 41 a chuak i, cu kahdohnak ah cun SAC ralkap lei 71 an thih lengah 53 hliam an tuar, tiah KNU nih a thanh.Crd;Thechinpost

Thawngdang. Magway ramṭhen le Chin ramkulh ramri San khuate chung um ralzam camp ah 2022 June 2 ah SAC ralkap nih Thantar raangmi thlir in ralzam camp ah facang le chiti an va pek hna, tiah theih a si.Kyaukthu(ကျောက်ထု) Vanlawng tual ah umhmun khuarmi SAC ralkap nih hmun hnih in an i ṭhen i, San khua um Tey phungki sianginn le ralzam camp ah an kal.

Nizan June 2 ah SAC ralkap 200 hrawng cu Kyaukthu Vanlawng bual in riahcaw i phorh in an chuak. Cheukhat cu San khuate um Mindat ralzam camp ah facang le chiti an pek hna. SAC ralkap an chuah caah khatlei umhmun No.(2) ummi hna cu zam an i tim. Fur caan a si caah a har ngaingai,” tiah Mindat tualchung mi pakhat nih a chim.

Umhmun No.(2) chung ah SAC ralkap an kal caah khuate mi le ralzam hna cu ka dang ah an zam ṭhan, tiah Mindat ralzam zohkhenhtu Committee nih cathanh an chuah. SAC ralkap an luhnak San Khua cu inn 240 leng umnak a si i, Mindat ralzam chungkhar 82, milu in 400 leng an um, tiah theih a si.