Magway ramṭhen, SaihPyo (ဆိပ်ဖြူ) peng SaihPyo-Saw lam cung um KaZunMa khua hnulei lam ah PDF ṭangṭi phu nih SAC ralkap pawl cu, bomb an puahhnawh hna, tiah theih a si. A luancia July 7 ah KaZunMa-PhaLungMa karlak meng tung 34-35 ah rallam a sialmi SAC ralkap motor cu an dir i, ke in a kalmi ralkap cu bomb in kan puah hna, tiah PDF nih an langhter.
An motor cu an dirter i, ke in an kal. Hlei cung ah ralkap pahnih an phanh, sml 11:00 hrawng ah bomb kan puahhnawh hna. Hri dawh phun bomb in kan puahhnawh hna mi he cun SAC ralkap 15 an thi, cu chungah ralbawi pakhat aa tel. A voi khatnak kan puah hna lioah motor pakhat ah ralkap 20 hrawng an i cit, an dihlak ah 300 leng an si lai.
SAC ralkap pawl cu PhaLanMa tlang lei ah umhmun an rak khuarmi an si,” tiah SaihPyo PDF Bo Baa Ma Hti nih a chim. Cu kahdohnak ah SaihPyo PDF, Chauk Pah Ka Pha le Saw Khuat Daung (ဆောခွပ်ဒေါင်း) Companny hna i bawm in an kah hna, tiah theih a si.
Relchih; Chin Miphun Palik 2 Hriamthil He Myine PDF Sin Ah CDM An Tuah Magway ramṭhen, Myine peng KaiṬawMah (ကိုင်းတောမ) palik sakhan in palik 2 cu nizaan July 8, zinglei ah Myine PDF sinah CDM an tuah tiah theih a si. CDM cawlcanghnak a tuahtu hna cu Private number lah/261731 Pasang le lah/284488 Lu Taw an si.
Meithal pakhat veve leng ah kuanfang 90 zong an i put tiah Myine PDF in Bu Latya nih a chim. Nizaan June 8, zinglei suimilam 9:45 hrawngah CDM an tuah hi a si. An pahnih in KaiṬawMah (ကိုင်းတောမ) palik sakhan in an si. An pahnih in BA 94 meithal pakhat veve an i put caah minung pakhat ah sing 50 laksawng pek an si” tiah a chim.
CDM cawlcanghnak a tuahtu ralkap cu Pakokko pengkomh KaiṬawMah (ကိုင်းတောမ) palik sakhan ah rian an ṭuannak ni 4 lawng a si rih, an pahnih in Chin miphun an si caah a tu ah cun Chin ramkulh lei ah kalter an si cang tiah theih a si. CDM cawlcanghnak a tuahtu palik 2 telh in Myine PDF sinah CDM cawlcanghnak a tuahtu ralkap dihlak 9 an si cang. Cu chung in minung 3 nih an hriamthil he CDM cawlcanghnak an tuah tiah Bu Latya nih a chim. Crd. The Chin Post.
Leave a Reply