RALHRANG LEI AH A DIRMI ICJ BIACEIHTU CHINA MIPHUN XUE HANQIN HI MIZEI DAH A SI. Arakan ramkulh Rohinya miphun cungah ralhranhnak le miphun cihmih timhnak tuahmi cungah Gambia nih kum 2019 ah Myanmar cu ICJ ah taza a cuai.Tazacuainak cungah ralhrang lei nih dohdalnak an tuah nain 22 Chiapa 2022 ah ICJ nih a dihlakin biachahnak a tuah, ralhrang nih dohdalnak a tuahmi cu a dihlakin hnon piak an si, ICJ nih pehzulh dingin biachahnak a ngeih.
ICJ biaceih zung nih Myanmar cungah bia a khiah nain ICJ biaceihtu 16 nih lungtlinnak ngei lo in ICJ biaceihtu pakhat a si ve mi China mi biaceihtu XUE Hanqin nih ralhrang nih an dohdalmi cu a cohlan i ICJ biaceih zung nih Myanmar cungah biachahnak chiah timhmi cu a cohlang lo tu a dohdaltu a si.ICJ biaceihnak ah China biaceihtu XUE Hanqin nih zei ti’n dah a ruah? zei ti’n dah ICJ biaceihtu a si ning zoh hna usih?
ICJ biaceih zung hi UN phu i phungning in le biaceihtu a si caah UN humhimnak council biaceihtu 15 thim an si, ICJ biaceihzung biaceihtu ah thim an si hnu in kum 9 tiang rianțuan ding an si.ICJ zung ah nizan ah tuahmi biaceihnak ah ralhrang lei ah voihnih tiang bak vote pemi China biaceihtu XUE Hanqin cu China cozah, Foreign Affair Ministry ah palai, Ministry ah riansang tlai, phunglam thiam, China cozah a tanh taktak mi a si.
A nih hi 29 Pur 2010 ah ICJ biaceihtu chungtel a si, Nohawng 2012 – 2021 tiang ICJ biaceihtu ah thim a si. ICJ biaceihtu Vice Chairman rian zong 8 Nohawng 2018 in 8 Nohawng 2021 tiang a tlaih.Nohawng 2021 ah ICJ biaceihtu ah thim than a si i ICJ beiceih zung i China biaceihtu dingah XUE Hanqin cu Nohawng 2030 tiang rianțuan ding a si.
China biaceihtu XUE Hanqin cu China Foreign Affair Ministry ah phunglam thiam, ruahnak petu, palai hna riankip a tlaimi a si.A nih hi 15 Zing 1955 ah China ram Shanghai khua ah a chuak i a tu ahcun kum 66 a si ve cang, Beijing ramdang holh cawnnak sianginn le Beijing sianghleirun in holh kong thiamhlei nak le, ramdang phunglam Diploma Degree a lami a si.
Kum 1983 ah Columbia University Law sianginn ah phunglam Master Degree telh in phunglam lei Degree hna a la.Cu hnuah China Wuhan University School of Law ah Professor le Victoria Chairman rian a tlai, kum 1980 ah China Foreign Affair Ministry ah rian a tuan i Ministry ah mangki bawizik in rian a tlai, China Foreign Affair Ministry ah bawizik zong a tlai fawn.
Cu hnuah Nederland ramlei pehtlaihnak China palai le Chemical hriamnam dohdalnak phu China palai in kum 2003 – 2008 tiang rian a țuan, Asean lei pehtlaihnak China palai rian zong a țuan fawn.Kum 2010 ah ICJ biaceih zung i biaceihtu ah thim a si, China chawlehnak runvengtu le China cozah humhimtu ti zong in ti khawh a si. Cucaah mithat lainawng ralhrang lei ah a dirnak cu ICJ zungah a langhter.
ICJ biaceihnak ah ralhrang nih dohdalnak an tuahmi a cohlang mi cu China biaceihtu XUE Hanqin a si bantukin ralhrang cu miphun cihmih timtu an si tiah ICJ biaceihnak nih a fehter mi cu XUE Hanqin nih a dohdal.ICJ bieceihtu a si vemi China miphun XUE Hanqin cu kum 2030 tiang rianțuan ding a si caah China cozah he i hawikom in chawlehnak a runven lai, cucaah Myanmar ralhrang nih teinak an hmuh khawh nakhnga a chim fawn lai. Credit: The Lairam Times.
Leave a Reply