RALHRANG HMUNKHUARNAK CNDF PHUFONH NIH AN KAH

SAC pawl hmunhma an khuarnak cu CNDF phufonh nih an kah , SAC ralkap 7 an thi, 5 nih hlianhma an tuar. Sagaing ramṭhen, Kalay khua chungah a ummi SAC ralkap pawl hmunhma an kuarnak hmun 3 cu CNDF phufonh hna nih May 10 zaanlei ah an kah hna i SAC ralkap 7 an thi, 5 nih hliamhma an tuar tiah CNO/CNDF nih a thanh.

Kalaymyo, Taungphyila sang ah a ummi cozah rianṭuan pawl an umnak inn dot 4 ah hmunhma a khuarmi SAC ralkap pawl cu CNDF nih May 10 zaan sml 8:00pm ah a thli tein an kah hna caah ralkap 6 an thi tiah theih a si.
Sanmyo sang ah a ummi riithai zung cu CNDF phufonh nih an kah hna lioah SAC ralkap 1 a thi i 3 an i hliam,

Tahan sang Naycia inn pawngah a ummi SAC gate cu an kah ṭhan hna i SAC ralkap 2 an i hliam tiah CNO/CNDF nih a thanh. SAC ralkap pawl cu CNDF, PDF-Kalay, CSS, GRF phu hna fonh in an kah hi a si i phufonh hna nih hliamhma tuar lo tein an kirtak khawh hna tiah theih a si.Kahdohnak lioah SAC ralkap nih hriamngan in kah thlorh an kah ruangah inn pakhat a khen i mipi pahnih an i hliam tiah theih a si. TCP

Thawngpang dang. Ralhrang kawlralkap nih Falam peng Parte khua ah thilri an firmi le an cawlcanghning an langhter cang. Ralhrang kawlralkap nih Falam peng Parte khua ah Vok pakhat an thah pin ah Ar an firmi hi a tlawmbik Ar 30 renglo a si tiah an langhter. Falam le Kalay lampi ah a ummi Parte khua cu May ni 10 ah ralhrang kawlralkap hna nih minung umnak inn 6 an khangh pin ah inn an bauh hna i, an duhmi thilri paoh an fir dih tiah theih a si.

Inn ruk a kaang dih i, inn pakhat cu tlawmpalte lawng a kaang manh. Hi konghe pehtlaiin khuami pakhat nih atanglei bantuk in a chim.Inn an bauh i an duhmi thilri paoh an lak hna, Vok pakhat an thah pin ah Ar hi Ar 30 renglo an lak tiah khuami pakhat nih a chim. Ralhrang kawlralkap hna nih Parte khua ah hriamnam ngan he a hme an puah thluahmah i an kah.

Curuang ah khuami pakhat kum 60 hrawng asimi zong a ke ah an khen tiah theih a si. Ralhrang kawlrlakap hna nih Parte khua an luh ah hin khuami hna cu a himnak hmun ah an zaam hna i, thenkhat khuami hna cu nizan May 10 suimilam pahra hrawngah khuachung ah an rak kir hna tiah thanhnak an tuah chih.