RALHRANG KAWLRALKAP CU AN I MUAICAWK TI LAI LO

Thawngpang tthatuk a si. Ralhrang caah cun thawngpang chia taktak si ve cang. tlamtling hram seh. Cunglei ralhrang helicopter le ralhrang vanlong kahnak hriamnam cawk dingin kan i zuamcuahmah tiah NUG cozah nih thanhnak an tuah. Ralhrang kawlralkap hna nih Jet raltuknak vanlong hmang in kah tikah lehrulhnak caah tiah PROJECT DRAGONGLY kalpi a si.

Cunglei kahnak hriamnam phunkhat cu hman a si cang tiah an langhter. Kalpi cuahmah mi PROJECT DRAGONGLY, project chungin tangka hmuhmi hna hi tukdohnak ah hman dingmi a si bantukin hriamnam thenkhat zong hman a si cang tiah an langhter chih. Cunglei vanlong kahnak hriamnam hi zeibantuk phun dah a si timi tucu an langhter lo.

Hi project kalpi nak ah tangka thawhtu le thiamsang vialte hna sin ah lawmhnak bia zong an chim. SAC ralkap hna nih vanlei kahdohnak an tuah tikah lehrulh cham kho ding in kan i zuam i, a luancia March thla thawk in April thla tiang ah, PROJECT DRANGONFLY in zeimawzat kan hmuh. Cu kan hmuh mi zat cu US dollar $ 20 lakhs hrawng a si, tiah NUG nih an thanh.

Thawngpang dang. Falam pengah ralhrang kawlralkap Helicopter voiruk tuni ah a ttum. Tuni August ni 11 zingka suimilam pasarih in Falam khuapi le Falam peng Rihkhawdar ah ralhrang kawlralkap helicopter voiruk a ttum. Khuami nih an chimmi cu zanlei suimilam pali tiang ah ralhrang helicopter hi voiruk a rak ttum tiah thanhnak an tuah.

Zingka suimilam pasarih in chun tiangah Ralhrang kawlralkap helicopter cu Rihkhawdar ah voithum a rak ttum i, zanlei suimilam pathum in Falam khuapi Vankau tlangah Helicopter voithum a rak ttum tiah theih a si. Nizan August ni 10 zingka suimilam pahnih in pasarih tiang India le kawlram ramri Rihkhawdar ah i kahnk chuak.

Ralhrang kawlralkap hna hi mipi ralkap hna nih an va kah hna. Hi kahdohnak ah ralhrang kawlralkap bawi pakhat telh in minung panga an thi i, minung pali CDM an tuah. I kahdohnak thawngpang a daih tlawmpal ah ralhrang kawlralkap raltuknak vanlong zong voili Rihkhawdar le Tio cungah aa hel. Asinain bomb cu a thla lo tiah theih a si.

Tuni ralhrang helicopter a rak phanmi konghe pehtlaiin khuami hna nih an zumhning ahcun nizan i ralhrang kawlralkap a thimi pawl ruak an rak lak pah hna i, cu ahcun ralhrang kawlralkap thaazaang zong an chap lai tiah zumh a si. Tio tlangah a ummi ralhrang kawlralkap hna cu mipi ralkap hna nih August nihnih in ni 7 tiang drone in an kah hna tiah theih a si.