Timit hlei SAC nih remh an timh caah kaphnih kar entainak a fak. Chin ramkulh, Hakha in Thantlang lei kalnak lam cungah a ummi Timit hlei cu CDF nih 2021 lioah rak chah a si nain atu ah SAC ralkap nih remh ṭhan an i timh caah CDF le SAC ralkap karlak entainak a fak tiah theih a si.
Hakha-Thantlang lam cu hman rih lo ding in CDF nih mipi ralrin a pek hna.SAC ralkap pawl cu July 28 zinglei ah ke in phukhat an kal, cun July 30 zong ah Hakha khuachung in mawṭaw pakhat in an kal ṭhan” tiah khuami hna nih The Chinland Post ah an chim.Hakha ah hram a bunhmi LIB 266 nih Hakha-Thantlang lamcung timit tiva lei ah thazang an chap lengmang tiah theih a si.
Atu timit hlei remh ding ah aa rak thawhmi hi July thla hramthok lei ah Sagaing ramṭhen, Kalaymyo in Hakha lei ah a raami an si i an raknak lam thluangthluan ah CJDC Special Force, CNA le CNDF phufonh nih voi 8 hrawng an kah hna caah SAC ralkap a thimi an rak tam tiah theih a si. Credit: The Chinland Post.
Thawngpang dang. Thantlang peng, CNA le CDF nih an humhakmi hmunram ah ca a cawngmi siangngakchia hna caminpuai cu July 25 in 27 tiang an tuah i, tlamtling tein an lim cang, tiah thawngpang kan theih. Thantlang peng caankarlak fimcawnnak department hruainak in tuahmi caminpuai a si i, SAC ralhrang nih uknak an chuh ruang ah fimnak tlamtling in a cawng kho lomi siangngakchia pawl kha thla 6 cu ca an chimh hna hnu ah atu ah caminpuai an tuah hi a si, tiah Thantlang peng caankarlak fimcawnnak zung luzik Salai Cross Thang nih a chim.
Ralkap nih uknak an lak ruang fimnak tlamtling in a cawng kho lomi siangngakchia pawl kha thla 6 chung ca kan chimh hna i, atu ah caminpuai kan tuah hi a si. Ahlan i tang 1 a simi kha atu caminpuai an awn cun tang 2 ah kaiter an si lai,” tiah a chim.Tukum September thla in caankarlak fimcawnnak kumthar thawk a si tthan lai i May 2023 tiang, thla 9 chung cacawn a si lai.
Atu kum September thla in cacawnnak thar kan thawk tthan lai. Hmaikum May thla tiang, thla 9 chung a si lai. Siangngakchia hna ca ah cauk (Textbook) tibantuk belte hi kan chambau ngai,” tiah a chim chap.Sianginn cachimtu saya/sayamate hi CDM a tuahmi hna le volunteer in a pum aa pemi mino hna an si. Thantlang peng caankarlak fimcawnnak zung lei nih cun lahkhah pek tibantuk in an bawm kho hna lo nain mahle khua i nulepa/bu hna nih an ti khawh tawk cio in akenkip in an bawmh ve hna.
NUG zong nih siangngakchia 50 ah 150,000 MMK rate in voi khat bawmhnak a rak pek hna. Atutan Thantlang peng chung caminpuai a phimi siangngakchia hi 7,000 hrawng an si i, cu chung ah cun ralhrial (IDP) siangngakchia 3,000 hrawng an i tel hna, tiah Salai Cross Thang nih a chim. Credit: The Chin Journal.
Leave a Reply