Ralhrang Motor Bomb Puahhnawh An Tong 10 An Thi

Chaung-U ah SAC Ralkap Nih Zulhmi Motor Bomb Puahhnawh an Tong I Ralkap 10 An Thi!: Chaung-U ah SAC ralkap nih zulhmi motor pakhat cu tualchung hriamtlai phufonh nih bomb puahhnawh in an doh hna, tiah Farmers Revolution Force FRF (CHU) nih nihin July 8 ah cathanh an chuah.

Nihin July 8, zinglei suimilam 9:00 hrawng ah Chaung-U in a chuakmi motor, SAC ralkap 15 hrawng nih an zulhmi cu bomb lung 15 puahhnawh an si i, SAC ralkap 10 hrawng an thi, tiah an thanh. Tualchung hriamtlai phufonh nih an hmanmi bomb cu a tha ṭhawng ngai mi bomb a si caah pe (ft’) 300 tiang hrawng a hnorsuan khawh i, cu motor zong cu faak ngai in a rawk tiah tualchung hriamtlai phu lei in hruaitu pakhat nih a chim.

SAC ralkap motor bomb a puahhnawhtu cu FRF (CHU) battalion le Myaung dohthlennak tuahtu phu MRA-Sagaing ramṭhen battalion 5 an si i, Zarmini MMU (Sagaing ramṭhen battalion 1) le Chaung-U Revolution Army (CRA-1) nih an bawmh hna, tiah theih a si.

Relchih; Yangon University of Education Student Union Hruaitu Hlun Cu Kum 8 Thongtla Ding In Bia An Ceih!: SAC ralkap nih an tlaih mi Yangon University of Education, Student Union hruaitu hlun Ko Soe Thura Kyaw (ကိုစိုးသူရကျော်) biazai tial thiam Thasian (သသျှား) cu June 27 ahkhan phungrelnak 52 (a) le 505 (a) in kum 8 thong tla ding in biaceih a si, tiah All Burma Federation of Student Union (ABFSU) nih an thanh.

Ko Soe Thura Kyaw cu SAC ralkap nih phungrelnak 52 (a) ca ah kum 5 thongthlak le phungrelnak 505 (a) ca ah kum 3, a dihlak kum 8 thong thlak ding in Mandalay Obu (အိုဘို) thonginn ah bia an ceih. Hi pinah hin Yangon ah biaceih ding mi case dang a ngei rih, tiah theih a si.

2021 September 24 ahkham SAC ralkap nih an rak tlaih i, amah hi Yangon University of Education Student Union hruaitu hlun a si pinah Basic Education General Strike Committee(BEGSC) chungtel zong a si fawn. SAC uk duh lo langternak zong ah a hruaitu langsar a si, tiah ABSFU nih an cathanh ah an langhter.

Cun, Yadanabo (ရတနာပုံ) University) ah a leng (distance) in a kai lio mi Ma Kyi Kyi Win (မကြည်ကြည်ဝင်း) cu SAC ralkap nih rianhrang ṭuan buin kum 3 thongtla ding in bia an ceih, tiah Yadanabo University Student Union nih an thanh. Ma Kyi Kyi Win hi CDM tuahtu nurse pakhat a si, tiah theih a si. Crd. The Chin Post.