Mipi le rampi karlak tlukruannak caah kan thah hna a si tiah SAC nih a chim. Myanmar ram Democracy a ngah khawh nak hnga cawlcangtu a simi Ko Kyaw Min Yu @ Ko Jimmy le Ko Phyo Zeya Thaw telh in minung 4 cu phungning tein kan zulhter mi hna si i anmah pawl cu voi tampi Death Penalty ( thihding sualphawtnak) pek an phu tiah SAC biachimnak nawl ngeitu Major-General Zaw Min Htun nih Press Conference ah a chim.
88 siahngakchia hruaitu Ko Jimmy le NLD palai hlun Ko Phyo Zeya Thaw nawlpeknak ruangah a thimi, sualnak ngei lo mipi le temhinnak a tuarmi aiawh in biaceih zung nih a dotdot in bia a ceih hna i Death Penalty (Thihding sualphawtnak) pek an si bantuk in biaceih zung ah biaalnak nawl le zangfah halnak nawl le chungkhar he tonnak nawl an ngei tiah a chim.
Zaw Min Htun nih ” An buarmi sualnak hi adang thihnak nawl chuahmi pawl he tahchunh ahcun voi tampi thihter ding an si. Mah kong hi pumpak huatnak ruangah tuahmi a si lo. Mipi tampi nih tlukruannak an hmuh khawh nak hnga le mipi le rampi karlak ah tlukruannak a um khawh nak hnga kan tuah a si” tiah a chim.Hramhram in uknak a latu SAC nih 2021 February 1 thok in duhlonak a langhter mi hngakchia telh in minung 1900 leng a thah cang i an luh ah tinh hramhram in a kah hna.
SAC nih a thahmi minung 4 an ruak cu atutiang an chungkhar nih hmuh khawh an ngah lo bantuk in zeitik ni dah an thah hna ti zong an thei kho lo.A thimi pawl an ruak kong he pehtlai in chungkhar sinah kan pek lomi hna hi thongbawi pawl nih tuahnak nawl an ngeih ning tein kan kalpi mi a si tiah a chim fawn.Atu bantuk Democracy a lennak hnga a cawlcangtu thah an sinak kong cungah ramchung dothlennak phu tampi, ASEAN telh in vawlei cung ramngan hna nih duhlonak an langhter. Credit: Thechinlandpost.
Good News. PDF nih ralhrang kawlralkap hnuzul Pyu Saw Htee kut in khuami minung pahra an chanhchuah hna pin ah Pyu Saw Htee hruaitu pahnihnak telh in minung pali an tlaih chih hna. Nizan July ni 26 suimilam hleikhat ah mipi ralkap PDF hna nih ralhrang kawlralkap hnu Pyu Saw Htee hruaitu a pahnihnak Aung Zaw Oo motor an kah.
Khuami minung pahra hna cu Pyu Saw Htee kut in an chanhchuah hna i anmah Pyu Saw Htee minung pali an tlaih chih hna. Pyu Saw Htee hruaitu a pahnihnak hi Sagaing khuapi in Cuaipung khua lei an tlun pah ah mipi ralkap Sagaing Cross Border Group le Sagaing District Regiment 2, Division 4 le Division 2 hna fonh nih an kah hna.
Motor chungah hin minung hleili an um. Hi chungah kum upa le hngakchia zong an um i, cu hna cu an thlah hna. Ralhrang kawlralkap hnuzul Pyu Saw Htee minung pali cu an tlaih hna i dotthletnak an tuah cuahmah lio a si tiah True Information Group chungin minung pakhat nih a chim.
Leave a Reply