Ram le miphun caah ka Fapa nih a nunnak a pek caah kai uangthlaartuk tiah U Phuo Zayar Thaw a nu nih a chim. Ralhrang kawlralkap hna nih ramkheel ruangah an tlaihmi minung pali U Phyo Zaya Thaw le U Kyaw Minyu, U Hlah Myo Aung le U Aung Thura Zaw hna cu Insein thongin chungah an thah hna. An thahmi chung ah U Phyo Zayar Thaw hi NLD pali tthing a si.
Cun Ko Jimmy timi Kyaw Minyu hi 88 chan lio ah sianghngakchia hruaitu pakhat a si. A dang minung pahnih zong hi ramkhel ruangah an tlaihmi hna a si i, ralhrang nih thah dingin biachahnak an tuah hna hnu ah atu bantukin an thah hna hi a si. An thah hna ni le caan hi an thanh lonain dotthlettu hna nih thenkhat nih July ni 23 ah thah an si tiah an thanh.
An thah hna hlan ah hin ralhrang kawlralkap hna nih chungkhar hna he tonnak an ngaihter hna. Mah zong hi online hmangin an chawnhter hna ti a si. Hi lio caan ah hin thah an si lai nak kong zeihmanh an chim hna lo. Asinain thawngpang a vun chuah hnu lawng an thei ve. Hi konghe pehtlaiin U Phyo Zayar Thaw a nu nih a tanglei bantuk in a chim.
Phyo Zazar Thaw a nu Dr. Daw Khin Win May nih a timi cu ka fapa hi misual le mifir a si lo. Ram le miphun caah a nunnak a pek mi cungah kai uangtuk. Zeitik Ni le caan ah an thah timi cu ka thei lo. July ni 25 chung ah Yangon Insein thonginn a ruak kan va hal hna. Asinain thonginn hngaktu hna nih kan inn pe hna lai lo tiah an chim. Ka Fapa i a ruhro lawng zong kan sin phak kan duh thatein kan vui lai tiah a chim.
Thawngpang dang. Paletwa mipi hna nih SAC he rianṭuanṭi lo ding in IKACC nih forhfialnak a tuah.Chin ramkulh, Paletwa peng ah a ummi mipi hna nih SAC telh in a kuttang phu pawl he rianṭuanṭi le thawngpang pek lo ding in Interim Khumi Affairs Coordination Council (IKACC) nih July 24 ah a thanh.Cubantuk SAC kuttang phu pawl he fonh in thawngpeknak hna a um caah Paletwa mipi 6 AA nih a tlaih cang hna tiah theih a si.
Cu kong he pehtlai in IKACC cathanh chungah “Tlaih a tongmi Paletwa khuami 6 an himnak, an tlaih hna lio caan chungah chungkhar he ton khawh nak le a caan a tlin tikah luat ṭhan khawh nak hnga AA he hnatlaknak kan ngei” tiah a ṭial.IKACC phu hi hramhram uknak hrawh, Federal Democracy ramkomh sernak le Paletwa peng luatnak caah rian a ṭuan cuahmah mi phu a si tiah an langhter.
Tlaih a tongmi hna an min, an umnak a fiangte cu AA le IKACC nih an thanh lo.Paletwa hmunhma ah SAC ralkap le AA karlak entainak a fak i a luancia July 24 zongah Abaungtha khua pawngah kahdohnak a rak chuak.Cu kahdohnak hnu ah SAC nih khuami le khuabawi cheukhat a tlaih hna i AA zong nih SAC ralkap thawng nan pek tiah khuami cheukhat a tlaih ve hna.A luancia 2019 November 3 ah NLD palai hlun U Wai Tin cu AA nih an rak tlaih i thlahnih hnuah an thlah ṭhan.
Leave a Reply