RALHRANG NIH AN THEIH KO NAIN AN THANH DUH BAK LO

Karenni ramkulh, Pruso peng le BawLaKhe peng tlawnkalnak lampi Pruso – Baw La Khe lampi cungah May 1 in 7 tiang kahdohnak ah SAC ralkap 44 an thi tiah KNDF nih cathanh an chuah. Pruso peng in Baw La Khe peng lei ah eidin le hriamnam thilri hna chanh ah a kal mi SAC ralkap mawtaw 30 hrawng le KNDF karlak kahdohnak fak a chuak i zarkhat chung ah kahdohnak voi 13 a chuak.

SAC ralkap mawtaw 8 a rawk i SAC ralkap 2 a nung in kan tlaih hna pin ah meithal zuun 15 le hriamnam dang kan lak khawh tiah KNDF nih an thanh.May 6 Law Gyikhu khua kahdohnak ah KNDF ralkap pakhat a nunnak a liam tiah tuanvo ngaitu pakhat nih a feh ter.

SAC ralkap mawtaw hna cu lamtan in an kah nak hna video zong KNDF nih May 8 ah an langhter i SAC ralkap tampi an thi i lampi cungah SAC ralkap mawtaw a kangh lio hmuh khawh asi. SAC ralkap a thi mi an tam nain SAC ralkap lei nih cathanh an chuah mi a um lo tiah theih a si. Credit: The Chin Post.

Relchih a duhmi caah thawngpang dang. Sagaing ramṭhen chung SAC ralkap nih an khangh mi khua hna chung in khua pakhat ca ah Kya Tanat-PDF nih chungkhar pakhat ah 50,000 Mmk bawmhnak an pek hna, tiah theih a si. Chungkhar 104 ca ah sing 52 tluk cu inn an sak ṭhan khawhnak ding caah kan bawmh hna, tiah Kya Tanat PDF in ṭuanvo ngeitu pakhat nih a chim.

Phaisa cu umnak ding ca ah a har mi mizapi umnak caah hlut mi a si. Mipi hi kan herh bik hna le kan zei zongte an si caah, mipi an harnak cu kan harnak a si ve, tiah Kya Tanat PDF in ṭuanvo ngeitu nih cun a chim. Sagaing ramṭhen chung ah khua tampi cu SAC ralkap nih meikhangh in an hrawhpiak hna i, mah umnak ah um ngam lo in ralzaam dirhmun a phan mi minung 2,40,600 an um lio, tiah UNOCHA Myanmar nih a thanh. Credit: The Chin Post.