Good News. KIA le ralhrang kahdohnak ah ralhrang kawlralkap minung 50 renglo an thi. Cu lawng silo ralhrang bawi pakhat zong hliam a tuar. Kahdohnak ah ralhrang kawlralkap hna nih raltuk vanlong le helicopter zong an hman rih. Phakanh, Se Yin khualei ah ralhrang kawlralkap le KIA, PDF an i kap.
Chung suimilam hleihnih renglo in zanlei suimilam pasarih renglo tiang kahdohnak a chuak i, ralhrang kawlralkap hna nih Jet vanlong le helicopter an hman tiah theih a si. Hi konghe pehtlaiin KIA lei nih an chimmi cu ralhrang kawlralkap hna nih raltuknak vanlong Jet in voi 13 bomb an thlak i, helicopter in voiruk bomb an thlak tiah an chim.
I kahdohnak ah ralhrang kawlralkap lei in minung 50 nak tlawmlo an thi i, ralbawi pakhat tatyinhmu zong hliam a tuar tiah theih a si. KIA le PDF lei in minung pali hliam an tuar i minung pakhat nih ram le miphun caah a nunnak a pek. Thawngpang fiang tein theih khawh a si rih lo. Seyin khua lei ah hin July ni 16 in kahdohnak hi pehzulh in a um.
Thawngpang dang. Ngaihchiatnak Thawng. Ralhrang kawlralkap nih kum 6 hngakchia telh in chungkhar an kahthah hna. Shan ramkulh Maisoe peng Maikuang lampi ah umhmun a khuarmi ralhrang kawlralkap hna nih Maisoe peng chungah ningcang loin hriamnam an thlah ruangah hngakchia kumruk te lawng a simi le a dang minung pahnih an kah hna tiah an thanh.
Sai Thiha le a nupi Nan Sai Lu cu an fa kum ruk a simi sianginn a kaimi an va hlam. Inn lei an tlung lio ah ralhrang kawlralkap hna nih an motor cu an kah. Motor chungah hringtu a nu le a fa kumruk hngakchia te cu an thi colh. Hringtu an pa zong sizung ah an kalpi nain a zan lila a nunnak a liam ve.
Hi konghe pehtlaiin khuami pakhat nih a chimmi cu An fate hi Maisoe khuapi chungah sianginn an kaiter i an va don lengmang tawn. Maisoe in khua an tlun lei lampi ah ralhrang kawlralkap hna nih an kah hna. Ralhrang minung pahnih hna hi uniform zong an i hrut lo. Hringtu pa bik a thih lo caah nam in an sawh rih. Cun motor chungi a ummi an thilri zong an lakpiak hna tiah a chim.
Leave a Reply