Magway ramṭhen, Pakokko peng Shiadu khua cu nihin July 8 zinglei ah SAC ralkap nih an khangh, tiah tualchung mi pakhat nih a chim. Nihin zing sml 8:00 hrawng ah SAC ralkap 100 hrawng nih kahdohnak zeihmanh um loin khua chungah an lut i, an Shiadu khua an khangh hi a si.
Shiadu khua cu inn 200 leng umnak khuate ngan a si i, mei kanghnak ruangah khua ning in a ciam. Khattelei ral in mei khu cu hmuh khawh a si. Shiadu khua Pawng ummi SaingPyo (စိုင်ဖြူ) zong nihin July 8 zing sml 11:00 hrawng ah an khangh ve, tiah tualchung mi hna sin in theih a si.
SAC ralkap pawl cu MyitChe-KywinChaung (မြစ်ခြေ-ကျွန်းချောင်း) ah umhmun an khuar i, phu an i ṭhen hna i atu bantukin khuate mei in an khangh hns hi a si, tiah theih a si. A luancia June thla lio zongah Taungpalu, DePyia le Kanpyo (တောင်ပလူ၊ ဒဲ့ပြား၊ အရှေ့ကမ်းဖြူ) khua hna zong an rak khangh i, Taungpalu khua cu a rak ciam dih.
Atu lio hi Pakokko khua chung cu humhimnak ṭha tein an lak i, khual helnak lam le lamtonnak hna ah umhmun an khuar. An umnak cu ṭha tein an ser tiah theih a si.
Relchih; Sagaing ramthen , Depeyin peng ah civil thuam aa hruk mi SAC ralkap 40 hrawng cu July 7 zan ah mizapi vengtu ralkap hna nih an kah hna, SAC ralkap hna rallam cu Depeyin khua he meng 2 a hlatnak Methey khua le Wabarah (ဝါဘာရ) khua karlak ah kan bawh hna i kan kah hna, SAC ralkap 12 an thi tiah DRPA in tuanvo ngeitu pakhat nih Mizzima ah a chim.
Leikuang chung ah si i SAC ralkap a thimi hna cu fiang tein kan hmuh khawh dih hna tiah a chim chih. Civil thuam sawhsawh in a rak ra mi cu SAC ralkap hna rallam cu thawng kan theih cia caah kan bawh hna i kan kah hna hi a si i minute 20 hrawng kaphnih kahdohnak a chuak.
Kan i kah lio ah Depeyin khuapi lei in hriamngan in kah an bawmh hna caah mizapi vengtu ralkap hna cu hnu kan tolh than. Cu kahdohnak cu DRPA (အာဏာရှင်တော်လှန်ရေးပြည်သူတပ်မတော်), Bu HmukSik phu, FRF phu Shwebo PDF Battalion 24, battalion 12, Galawy Force le Depeyin mizapi vengtu ralkap hna kan i bawm tiah a chim. Crd. The Chin Post.
Leave a Reply